So‘nggi kunlarda Instagram tarmog‘ida ko‘plab o‘zbek san’atkorlari “Super dada” nomli filmda suratga tushayotgani haqida xabarlar tarqaldi. “Daryo” muxbirlari aktyor, rejissor Muhammadali Navro‘zov suratga olgan navbatdagi film premyerasidan reportaj tayyorladi.
“Super dada” filmining premyerasida o‘zbek shou-biznesining ko‘plab vakillari, vaynerlar va kino olamining ko‘zga ko‘ringan vakillari ishtirok etdi. Filmda Muhammadali Navro‘zov, uning o‘g‘li Shoxruhxon, Durdona Qurbonova, Oybek Teshaboyev, Bonamur va boshqa ko‘plab mashhurlar suratga tushgan.
Xonanda Shoxruhxon premyeraga rafiqasi Asal Shodiyevasiz keldi. U ukasini qo‘llab-quvvatladi va film haqida o‘z fikrlarini bildirib o‘tdi.
“Filmning yo‘nalishi, ruhiyati menga juda yoqdi. Ukam rejissorlik faoliyatini boshlaganiga juda ham xursandman, chunki undan juda yaxshi organizator va rejissor chiqadi. Film tomoshabinga xursandchilik, mehr-muhabbat beradi, umuman, oilaviy ko‘riladigan yaxshi film. Kelajakda yaxshi takliflar bo‘lsa, boshqa rejissorlar bilan hamkorlikda ishlaymiz”, — deydi Shoxruhxon.
“Filmda hozirgi zamondagi tashvishlar hamda har bir erkak kishining ichidagi muammolari, his-tuyg‘ulari ko‘rsatilgan. Bu yangicha yo‘nalishdagi kriminal-komediya, ya’ni ‘Bo‘rilar’ filmi yo‘nalishidagi yangi ‘Super dada’ kinokartinasi. Loyiha ikki marta suratga olingan, bir marta tugatib, ikkinchi marta qozog‘istonlik do‘stlarimiz bilan ishlab, bitirdik. Filmga taklif qilinganlarning hech biri rad javobini bermadi.
Biz tanlagan aktyorlarimiz — Bekzod Tojiyev, Bonamur, Durdona Qurbonova, Yamin, Oybek Teshaboyev, Ruxshona, Dilshodbek Kattabekov. Har bitta inson o‘zini o‘ynagan, o‘z qirralarini ochib bergan”, — deydi bosh qahramon va rejissor Muhammadali Navro‘zov.
Mazkur film kinoteatrlarda namoyish etilmaydi, uni faqat Muhammadali Navro‘zov g‘oyasi asosida tashkil etilgan platforma orqali tomosha qilish mumkin.
“Qiynalish bo‘lmadi. Muhammadali aka bilan rol o‘yganim uchun qiynalmadim. Filmda qiziqarli jarayonlar ko‘p bo‘ldi. Loyihadagi rolim o‘zimga umuman o‘xshamaydi, hayotda boshqa, filmda boshqachaman”, — deydi Bonamur.
“Filmdan juda yaxshi kayfiyat kutyapmiz. Muhammadaliga omad tilayman. U ham, men ham kam film suratga olinayotgan vaqtda ishlayapmiz. Hech kimning ijodiga qarshiligim yo‘q. Aktyorlar, aktrisalar har doim tanqis bo‘lgan. ‘Ko‘chadan kirib kelgan’, Instagram’da o‘zini ko‘rsata olgan ijodkorlarni xalq taniyapti. Bu ham juda katta narsa. Vaynerlik ham mashaqqatli ish.
Aktyorlik mahorati yetsa, uni vayner, bloger yoki futbolchi deb bo‘lmaydi. Bu sohada o‘qimagan deb bahosini pastga tushirib bo‘lmaydi”, — deydi aktyor Azamat Ahrorov.
Muhammadali Navro‘zov 23-avgust kuni nafaqat film taqdimotini, balki tavallud kunini ham nishonladi. Uning ilk filmi “Mening to‘yim” ham o‘tgan yili xuddi shu kunda premyera qilingandi.
“Boshlagan ishlari xayrli bo‘lsin. Men Muhammadali hech qachon yomon film yaratmasligiga ishonaman. Ijodiy jamoaga omad. So‘nggi paytlarda sokin qo‘shiq kuylayotganimning sababi — muxlislarning talabi. Shunaqa qo‘shiqlarni yaxshi ko‘rib tinglashyapti.
Kelajakda filmlarda suratga tushish niyatim yo‘q, hamma o‘zining ishini qilsin. Ora-orada yaqinlarim filmga taklif qilgani uchun suratga tushganman, lekin baribir o‘z kasbimni mukammal darajada olib borganim ma’qulroq, deb o‘ylayman” — deydi Umidaxon.
“Filmdagi obrazim ‘Bo‘rilar’ filmidagi Sherzod obrazi. Oradan yillar o‘tib, ushbu film qahramonlari nima ish bilan shug‘ullanishi haqida hikoya qilinadi. Film bekorga ‘Super dada’ deb nomlanmagan.
Faoliyatimda tanaffus qildim, bunga esa ‘Bo‘rilar’ filmidan keyin salbiy rollarga taklif qilishgani bo‘ldi, ularning barchasini rad etdim. O‘xshashlik tomoshabinning joniga tegadi. Rejissorlar boshqacharoq rollarga taklif qilishsa, ularni ham uddalashimni ko‘rsatish niyatidaman”, — deydi aktyor Bekzod Tojiyev.
“Bundan bir necha yil oldin xuddi shunaqa Muhammadalini sahnaga olib chiqqanman. Bugun esa kichkina Muhammadali Navro‘zov ekranlarga chiqdi. Ularning nevarasini ham yulduz bo‘lganini ko‘rish nasib etsin”, — deydi mahoratli rejissor Zebo Navro‘zova.
Quyida “Super dada” filmi premyerasidan tayyorlangan reportajni to‘liq tomosha qilishingiz mumkin.
Izoh (0)