Ukrainaning Vinnitsa viloyatida yog‘och ortilgan yuk mashinasi va yengil avtomashina to‘qnashuvi oqibatida mashinadagi 12 kishi halok bo‘ldi. Qurbonlarning barchasi — ular orasida 2 yoshdan 12 yoshgacha bo‘lgan olti bola ham bor — bir oila a’zolari edi. YTH vaqtida ularning barchasi eski “Jiguli”da bo‘lgan.
Yuk mashinasi haydovchisi birinchi bo‘lib yo‘l harakati qoidalarini buzganlikda gumon qilinayotgan bo‘lsa-da, Vinnitsa politsiyasi hozircha nima bo‘lgani haqida aniq ma’lumotga ega emasligini, tergov davom etayotganini aytdi.
Shu bilan birga, “Jiguli” haydovchisi kamida kechki payt va gavjum trassada shuncha odamni bitta mashinada tashish orqali qoida buzgani aniq.
Katta oila
Brodetskoye posyolkasi rahbari Igor Tkachukning BBC ukrain xizmatiga aytishicha, “Jiguli”da bo‘lganlarning barchasi bir oila edi.
Mashinada haydovchidan tashqari uning rafiqasi, ikki yashar o‘g‘li, voyaga yetmagan qizi, qaynonasi va bolaning cho‘qintirgan otasi bo‘lgan. Bundan tashqari, mashinada haydovchining akasi va uning oilasi: rafiqasi va to‘rt nafar farzandi o‘tirgan.
“O‘sha kuni ular haydovchining o‘g‘li — avtomobildagi eng kichik bolaning tug‘ilgan kunini nishonlagan”, — deb tushuntiradi Tkachuk. “Ular nima uchun bitta mashinaga o‘tirganiga mantiqiy izoh yo‘q, chunki ikki aka-ukaning uchta mashinasi bore edi”.
BBC 12 kishi kichkina mashinaga, hatto u universal “VAZ” bo‘lgan taqdirda ham, qanday sig‘gani hayratlanarli ekanini ta’kidladi.
Universal “VAZ 2102” besh kishini tashish uchun mo‘ljallangan
Igor Tkachukning so‘zlariga ko‘ra, xalq orasida “dvoyka” deb nomlanuvchi “VAZ 2102” mashinasiga, aftidan, “VAZ 2106”ning o‘rindiqlari uchinchi qator sifatida o‘rnatilgan.
Ushbu modelni ishlab chiqarish SSSRda 1986-yilda to‘xtatilgan, shuning uchun mashina juda eski edi.
“Bolalar kattalarning qo‘lida bo‘lgan. Oldingi o‘rindiqdagi yo‘lovchining qo‘lida ikki bola o‘tirgan. Qolganlari orqada”, — deb aniqlik kiritdi posyolka rahbari.
Uning so‘zlariga ko‘ra, haydovchi va uning akasi kambag‘al oiladan chiqqan edi, yigitlar maktab-internatda ulg‘aygan, ammo keyin ular yaxshi yashay boshlagan. Ular mehnatkash edi, ichkilik ichmasdi, o‘zlariga uy qurdi, mashinalar sotib oldi, oila qurdi, deb hikoya qiladi Tkachuk.
Kechqurun katta yo‘lda ularni avtomobilni bu tarzda haydashga nima majbur qilgani sirligicha qolmoqda. Mutaxassislar hodisa tafsilotlarini aniqlashda davom etmoqda.
“VAZ haydovchisi mast bo‘lganmi yoki yo‘qmi, bilmayman, deydi posyolka rahbari. “Lekin ular o‘tirgan, ichishgan, chunki o‘g‘lining tug‘ilgan kuni edi. Yana bir omil — quyosh. Kechki soat 19:00 da "Jiguli" g‘arb tomonga yo‘l olgan, balki quyosh haydovchining ko‘zini qamashtirgandir”.
Izoh (0)