Украинанинг Винница вилоятида ёғоч ортилган юк машинаси ва енгил автомашина тўқнашуви оқибатида машинадаги 12 киши ҳалок бўлди. Қурбонларнинг барчаси — улар орасида 2 ёшдан 12 ёшгача бўлган олти бола ҳам бор — бир оила аъзолари эди. ЙТҲ вақтида уларнинг барчаси эски “Жигули”да бўлган.
Юк машинаси ҳайдовчиси биринчи бўлиб йўл ҳаракати қоидаларини бузганликда гумон қилинаётган бўлса-да, Винница полицияси ҳозирча нима бўлгани ҳақида аниқ маълумотга эга эмаслигини, тергов давом этаётганини айтди.
Шу билан бирга, “Жигули” ҳайдовчиси камида кечки пайт ва гавжум трассада шунча одамни битта машинада ташиш орқали қоида бузгани аниқ.
Катта оила
Бродетское посёлкаси раҳбари Игор Ткачукнинг BBC украин хизматига айтишича, “Жигули”да бўлганларнинг барчаси бир оила эди.
Машинада ҳайдовчидан ташқари унинг рафиқаси, икки яшар ўғли, вояга етмаган қизи, қайнонаси ва боланинг чўқинтирган отаси бўлган. Бундан ташқари, машинада ҳайдовчининг акаси ва унинг оиласи: рафиқаси ва тўрт нафар фарзанди ўтирган.
“Ўша куни улар ҳайдовчининг ўғли — автомобилдаги энг кичик боланинг туғилган кунини нишонлаган”, — деб тушунтиради Ткачук. “Улар нима учун битта машинага ўтирганига мантиқий изоҳ йўқ, чунки икки ака-уканинг учта машинаси боре эди”.
BBC 12 киши кичкина машинага, ҳатто у универсал “ВАЗ” бўлган тақдирда ҳам, қандай сиғгани ҳайратланарли эканини таъкидлади.
Универсал “ВАЗ 2102” беш кишини ташиш учун мўлжалланган
Игор Ткачукнинг сўзларига кўра, халқ орасида “двойка” деб номланувчи “ВАЗ 2102” машинасига, афтидан, “ВАЗ 2106”нинг ўриндиқлари учинчи қатор сифатида ўрнатилган.
Ушбу моделни ишлаб чиқариш СССРда 1986 йилда тўхтатилган, шунинг учун машина жуда эски эди.
“Болалар катталарнинг қўлида бўлган. Олдинги ўриндиқдаги йўловчининг қўлида икки бола ўтирган. Қолганлари орқада”, — деб аниқлик киритди посёлка раҳбари.
Унинг сўзларига кўра, ҳайдовчи ва унинг акаси камбағал оиладан чиққан эди, йигитлар мактаб-интернатда улғайган, аммо кейин улар яхши яшай бошлаган. Улар меҳнаткаш эди, ичкилик ичмасди, ўзларига уй қурди, машиналар сотиб олди, оила қурди, деб ҳикоя қилади Ткачук.
Кечқурун катта йўлда уларни автомобилни бу тарзда ҳайдашга нима мажбур қилгани сирлигича қолмоқда. Мутахассислар ҳодиса тафсилотларини аниқлашда давом этмоқда.
“ВАЗ ҳайдовчиси маст бўлганми ёки йўқми, билмайман, дейди посёлка раҳбари. “Лекин улар ўтирган, ичишган, чунки ўғлининг туғилган куни эди. Яна бир омил — қуёш. Кечки соат 19:00 да "Жигули" ғарб томонга йўл олган, балки қуёш ҳайдовчининг кўзини қамaштиргандир”.
Изоҳ (0)