21 августдан бошлаб Ўзбекистон мусулмонлари идораси ҳамда Дин ишлари бўйича қўмита ҳамкорлигида Бухоро вилоятида ўтказиладиган маънавий-маърифий тарғибот тадбирлари бошланди.
Дин ишлари бўйича қўмитанинг маълум қилишича, “Жаҳолатга қарши маърифат” шиори остида бўлиб ўтаётган маънавий-маърифий тарғибот тадбирлари мамлакат бўйлаб кенг қамровда олиб борилмоқда.
21 августдан бошлаб Республика ишчи гуруҳи томонидан Бухоро вилояти бўйлаб корхона-ташкилотларда, маҳалла ва бозорларда, шунингдек, мактаб ўқувчиларининг ота-оналари, уюшмаган ёшлар ҳамда хотин-қизлар билан тарғибот тадбирлари ташкил этилади.
Бухоро шаҳар ҳокимлиги матбуот хизматининг билдиришича, ишчи гуруҳ Дин ишлари бўйича қўмита, Халқаро ислом академияси, Мусулмонлар идораси ва бошқа бир қанча масъул ташкилот вакилларидан иборат.
Тарғибот тадбирлари ёш авлодни миллий ватанпарварлик руҳида тарбиялаш, жиноятчиликни олдини олиш, инсонларда даҳлдорлик ҳиссини юксалтириш, ёшларни турли ғоявий таҳдидлардан асраш, аёлнинг оила ва фарзанд тарбиясидаги ўрнини мустаҳкамлаш, маърифатли миллат тарбиялашда ота-онанинг роли каби қатор мавзуларда ўтказилмоқда.
Вилоят ҳокимлиги матбуот хизматининг хабар қилишича, Мир Араб олий мадрасасида ўтказилган тадбирга Республика бўйича барча вилоятларда фаолият юритиб келаётган 219 та туман, шаҳар бош имом-хатиблари ташриф буюрди.
Тарғибот тадбирларининг асосий қисми Ёшлар маркази биносида ташкил этилди. Унда шаҳарда фаолият олиб бораётган давлат идоралари, корхона ва ташкилот раҳбар-ходимлари, маҳаллалар бешлиги, соғлиқни сақлаш соҳаси вакиллари, мактабгача ва умум таълим мактаблари директорлари иштирок этди.
Изоҳ (0)