Тошкент шаҳар маҳаллий бюджетидаги қўшимча 361 млрд сўм нималарга сарфланиши маълум бўлди

Тошкент шаҳар ҳокимининг пойтахт маҳаллий бюджетини 2023 йилдаги қўшимча манбаларини харажатларга йўналтириш тўғрисидаги қарори қабул қилинди.

Халқ депутатлари Тошкент шаҳар кенгаши депутатлари қўшимча манбалардан шаклланган 361 миллиард сўмдан ортиқ маблағларни тақсимлади. Унга кўра:

• Бектемир ва Яшнобод туманлари электр тармоқларида таъмирлаш ишлари учун — 3,9 миллиард сўм;
• Давлат органлари ва унинг мансабдор шахслари томонидан тадбиркорлар/фуқароларга етказилган зарарни қоплаш учун — 30 миллиард сўм;
• 1 800 нафар эҳтиёжманд оилага ипотека кредити дастлабки бадали ва фоиз тўловларининг бир қисмини қоплаш учун — 70,3 миллиард сўм;
• Юнусобод тумани Пенсия жамғармаси бўлими ходимларининг кўрсаткичларини махсус электрон мосламалар орқали баҳолаш тизимини ҳамда фуқароларга қулайлик яратиш мақсадида электрон навбат тизимини жорий қилиш учун 250 миллион сўм;
• Нукус шаҳридаги уйларнинг томларини янгилаш ҳамда авариявий ҳолатга келиб қолган уйларни янгидан қуриш учун — 20,1 миллиард сўм;
• “Янги Ўзбекистон” боғига туташ ҳудудда инфратузилма ва коммуникация тармоқларини ётқизиш учун — 0,5 млрд сўм;
• Пойтахт маҳаллаларида 2022 йилдан ўтган ижтимоий инфратузилма ва бошқа объектларни таъмирлаш ҳамда қуриш ишларини якунлаш учун — 34,8 миллиард сўм;
• Аввалги йиллардаги қурилиш ишларидан кредитор қарздорликни қоплаш учун — 35,7 миллиард сўм;
• Прокуратура органлари фахрийларини қўллаб-қувватлаш жамоатчилик маркази биносини таъмирлаш учун — 3,2 миллиард сўм;
• Пойтахтдаги 527 ва 194-давлат боғчаларини реконструкция қилиш учун — 21,5 миллиард сўм;
• Юнусободдаги “Оқтепа” маҳалласига янги оқова сув тармоғини ўтказиш — 6,2 миллиард сўм;
• Туманлар ҳокимликлари қошидаги “Аёллар дафтари” жамғармалари маблағларини шакллантириш учун — 40 миллиард сўм;
• Туманлар ҳокимликлари қошидаги “Ёшлар дафтари” жамғармалари маблағларини шакллантириш учун — 40 миллиард сўм;
• “Саховат ва кўмак” жамғармаси маблағларини шакллантириш учун — 15 миллиард сўм.

Шунингдек, Болаларни соғломлаштириш ва аҳоли саломатлигини тиклашга кўмаклашиш жамғармаси маблағларини шакллантириш учун 26,5 миллиард сўм ва Янгиҳаёт туманини ташкил этиш харажатлари учун 13,2 миллиард сўм миқдорида маблағ ажратилади.

Эслатиб ўтамиз, 14 июль куни Тошкент шаҳрининг маҳаллий бюджети ҳисобидан “Пахтакор” футбол клуби ҳисобига 7 миллиард сўм маблағ ўтказиб берилиши ҳақида хабар эълон қилинган эди. Кейинроқ шаҳар ҳокимлиги ҳолатга муносабат билдириб, ҳокимлик клубнинг таъсисчиси ва бош ҳомийси эканини таъкидлаганди.