“Qishloq qurilish bank” “Biznesni rivojlantirish banki”ga aylantiriladi. Bu haqda 18-avgust kuni tadbirkorlar bilan ochiq muloqoti davomida prezident Shavkat Mirziyoyev maʼlum qildi.
Muloqot davomida davlat rahbari kichik biznesga yangi imkoniyatlar yaratish muhimligini taʼkidlagan. Qayd etilishicha, so‘nggi yillarda mamlakatda mikro-biznes va oilaviy tadbirkorlikni rivojlantirish bo‘yicha amalga oshirilgan ishlar natijasida bugun har bir mahallada kamida 40-50 nafar yangi tadbirkor paydo bo‘lib, minglab doimiy ish o‘rinlari yaratilmoqda.
“Lekin kichik biznesni manzilli qo‘llab-quvvatlash, ularga zarur shart-sharoitlar yaratish borasida qulay muhit hali to‘liq shakllanib ulgurmadi”, — dedi davlat rahbari.
Kichik tadbirkorlar “oyoqqa turib olishi” va faoliyatini kengaytirishi uchun mutlaqo yangi yondashuvlar joriy qilinadi. Bunda, ushbu soha vakillarini tadbirkorlikka o‘qitish, ularga loyiha qilib berish, faoliyatini moliyalashtirish, mahsulotlariga bozor va biznesiga sheriklar topish bo‘yicha yaxlit eko-tizim yaratiladi.
Shavkat Mirziyoyevning aytishicha, buning uchun, eng avvalo, “Qishloq qurilish bank” “Biznesni rivojlantirish banki”ga aylantiriladi. Ushbu yangi bankning faoliyati ham, ishlash uslubi va moliyalashtirish mexanizmlari ham yangicha bo‘ladi.
“Jumladan, bank huzurida har bir hududda jami 14 ta kichik biznes markazlari tashkil etiladi. Markazlar tashabbuskorlarning biznes loyihalarini ishlab chiqishga ko‘maklashadi, o‘z hisobidan yangi loyiha qilmoqchi bo‘lgan tadbirkorlarni o‘qitadi, yangi loyihalarga zarur mutaxassislarni jalb qiladi, tadbirkorlar uchun buxgalteriya, soliq, audit, marketing, huquqiy va boshqa konsalting xizmatlarini ko‘rsatadi”, — deydi prezident.
Kuni kecha Shavkat Mirziyoyevning bir guruh faol tadbirkorlarni taqdirlash, bugun esa soha vakillaridan bir guruhini mukofotlash to‘g‘risidagi farmoyishlari e’lon qilingandi.
Izoh (0)