Ayni paytda Shavkat Mirziyoyev Xalqaro kongress markazida O‘zbekistonda tadbirkorlikni rivojlantirish borasidagi ustuvor vazifalar to‘g‘risida nutq so‘zlamoqda.
Prezidentning qayd etishicha, 2023-yil olti oyida tekshirishlar o‘tgan yilning mos davriga nisbatan 40 foizga kamaygan.
Yaʼni tadbirkorlar to‘g‘ri ishlash “soyada ishlashdan” afzal ekanini tushunib yetmoqda. Shuning uchun ham soliq hisobotlarini topshirish va kameral tekshirish natijalari bo‘yicha moliyaviy jarimalar qo‘llash bekor qilindi, — deydi davlat rahbari.
Ta’kidlanishicha, o‘tgan bir yilda kichik tadbirkorlar soni 40 ming nafarga ko‘paygan, o‘rta tadbirkorlar soni 2 ming nafarga oshib, 10 mingga yetgan. Yirik korxonalar soni esa bir yilda 400 taga ko‘payib, 1,5 mingta bo‘lgan.
Berilgan yengilliklardan foydalanib, bir yilda 155 ta korxonaning yillik aylanmasi 100 million dollardan oshgan. Kiritilgan yillik xorijiy sarmoyalar hajmi esa ilk bor 10 milliard dollarga yetgan.
“Bo‘lib o‘tgan ochiq muloqotlardan keyin so‘nggi ikki yilda korxonalarimiz tomonidan 25 milliard dollarlik mahsulotlar eksport qilindi va avval import qilingan 10 milliard dollarlik mahsulotni o‘zimizda ishlab chiqarish yo‘lga qo‘yildi”, — deydi Shavkat Mirziyoyev.
Bundan oldin Shavkat Mirziyoyev Tadbirkorlar kuni munosabati bilan soha vakillaridan bir guruhini mukofotlash to‘g‘risidagi farmoyishni imzolagani to‘g‘risida xabar berilgandi.
Izoh (0)