Qirg‘izistonda masjid va madrasalar ommaviy tekshirilmoqda

11-avgust kuni Bishkekda maxsus tuzilgan komissiya masjid va madrasalarni tekshirishga kirishdi. Bu haqda Qirg‘iziston musulmonlari diniy boshqarmasiga tayanib, Asia-Plus xabar berdi.

Qayd etilishicha, masjid va madrasalarning hujjatlari, jumladan, ular joylashgan uchastkalar ham tekshiruvdan o‘tadi. O‘quv dasturlari, sanitariya-gigiyena va yong‘in xavfsizligi qoidalariga rioya etilishi ham ko‘zdan kechiriladi.

Tekshiruvga hozirlik ko‘rmagan rahbarlarga nisbatan tegishli choralar ko‘rilishi ta’kidlanmoqda.

Avvalroq Qirg‘izistonning O‘sh viloyatida o‘tkazilgan tekshiruv natijalariga ko‘ra 39 ta masjid va 21 ta islomiy ta’lim muassasasi faoliyati to‘xtatilgani, 48 ta masjid va 40 ta diniy ta’lim muassasasi bo‘yicha ko‘rsatmalar berilgani ma’lum bo‘lgandi.

Bungacha Jalolobod viloyatida idoralararo komissiya tomonidan noqonuniy faoliyat yuritayotgan 60 ta masjid aniqlangan.

So‘nggi maʼlumotlarga ko‘ra, Qirg‘izistonda 2,6 mingga yaqin masjid, 100 ga yaqin madrasa va 10 ta islomiy institut mavjud.