“Ro‘mol o‘rashsin”: Qirg‘izistonda ayollarga qora burqa kiyishni taqiqlash taklif qilindi

Jogorku Kenesh deputati Sharapatkan Majitova qirg‘iz ayollariga qora burqa kiyishni taqiqlashga chaqirdi. Bu haqda Sputnik xabar berdi.

Parlament yig‘ilishida Majitova O‘shga “ijtimoiy paket uchun 100 ming somlik guvohnoma” tarqatish uchun borganini aytdi. Uning so‘zlariga ko‘ra, yig‘ilishga kelgan ayollarning aksariyati burqa kiygan (gap yuzni berkituvchi niqob haqida ketmoqda).

“Hamma qora kiyimda, faqat ko‘zlar ko‘rinib turibdi. O‘shda shunday kiyinadigan ayollar ko‘p. Muftiylar tushuntirish ishlarini olib borsin. Ro‘mol o‘rashsin, lekin qora kiyimga o‘ralishning nima keragi bor?”, — degan deputat.

U prezident va Vazirlar Mahkamasining parlamentdagi vakili Almas Abitovdan tegishli protokol topshirig‘ini berishni so‘ragan.