AQSH Senatining tashqi aloqalar qo‘mitasi rahbari Robert Menendez Qirg‘iziston prezidenti Sadir Japarovga maktub yo‘llab, Rossiyaga qarshi sanksiyalarga amal qilishga chaqirdi. Maktubning to‘liq matni AQSH Senati saytida eʼlon qilindi.
Murojaat Qirg‘iziston xalqaro sanksiyalarni chetlab o‘tib, Rossiyaga yordam bergani haqidagi iddaolar bilan bog‘liq. Menendez bunday ayblovlar demokratik tamoyillardan chetlanish fonida yuzaga kelganini ta’kidlab, Sadir Japarovni yo‘nalishni o‘zgartirishga chaqirdi.
“Urush boshlanganidan beri Qirg‘iziston Rossiya bilan import-eksport biznesini keskin kengaytirdi. Hukumatingizning harakatsizligi yoki undan ham yomoni, Rossiya bilan dronlar, samolyot qismlari, qurol komponentlari va elektr zanjirlari kabi sanksiyalangan mahsulotlar savdosini osonlashtirishda ishtirok etishi Rossiyaga xalqaro sanksiyalarni chetlab o‘tish imkonini beradi”, — deyiladi maktubda.
Senator Qirg‘iziston hukumatini sanksiyalardan bo‘yin tovlash bo‘yicha ushbu jiddiy ayblovlarni zudlik bilan tekshirishni va mamlakat orqali noqonuniy tovarlar oqimining oldini olish uchun kuchliroq tizim yo‘lga qo‘yishga chaqirdi.
“Bundan tashqari, Qirg‘izistonning Rossiyaga qarshi xalqaro sanksiyalarni qo‘llab-quvvatlamagani davom etayotgan demokratik orqaga siljish va inson huquqlarining keng miqyosda buzilishining alomati, xolos, deb qo‘rqaman.
Hukumatingiz hokimiyat institutlarini zaiflashtirdi, jurnalistlar va mustaqil ommaviy axborot vositalarining huquqlarini qayta-qayta poymol qildi, huquq himoyachilarini ta’qib qildi, fuqarolik jamiyati vakillariga cheklovlar qo‘ydi. Bir paytlar Markaziy Osiyoda demokratiyaning yorqin nuri bo‘lgan Qirg‘iziston avtokratiya sari xavfli yo‘ldan bormoqda”, — deydi senator.
U Qirg‘iziston prezidentini mustaqil ommaviy axborot vositalari va jurnalistlar faoliyatiga qo‘yilgan barcha cheklovlarni olib tashlashga, qamoqqa olingan huquq himoyachilarini ozod qilishga va uyushmalar erkinligi kabi asosiy erkinliklarni cheklovchi choralarni bekor qilishga chaqirdi.
Izoh (0)