Armanistondagi Sevan ko‘lida Ukraina elchisi vazifasini bajaruvchi Aleksandr Senchenko cho‘kib ketdi. Bu haqda Ukraina Tashqi ishlar vazirligi xabar berdi.
“Ukraina Tashqi ishlar vazirligi chuqur qayg‘u bilan 2023-yil 13-avgust kuni tajribali va yuqori malakali diplomat, Ukrainaning Armanistondagi muvaqqat ishlar vakili Aleksandr Anatolevich Senchenkoning fojiali vafot etgani haqida xabar beradi”, — deydi vazirlik.
Avvalroq Sevan ko‘lida bir kishi halok bo‘lgani haqida Armaniston ommaviy axborot vositalari xabar bergandi. Unda 13-avgust kuni mahalliy vaqt bilan soat 20:17 da navbatchi qutqaruvchilar ko‘lda cho‘milayotgan fuqaroning g‘oyib bo‘lganini payqagani aytilgan.
“Qutqaruvchilar yordamga shoshilgan, fuqaroni suvdan olib chiqqan. Hodisa joyiga yetib kelgan tez tibbiy yordam brigadasi esa erkakning o‘lganini maʼlum qilgandi”, — deyilgan xabarda.
Keyinchalik ommaviy axborot vositalari marhum Ukrainaning Armanistondagi elchisining maslahatchisi bo‘lganini xabar qilgan.
Aleksandr Senchenko Tashqi ishlar vazirligida 2003-yildan beri ishlab kelgan. Diplomatik faoliyati davomida u vazirlikning birinchi hududiy boshqarmasida, Yevro-Atlantika hamkorlik departamentida ishlagan, shuningdek, Armanistonda uzoq muddatli xizmat safarlarda bo‘lgan.
Izoh (0)