Арманистондаги Севан кўлида Украина элчиси вазифасини бажарувчи Александр Сенченко чўкиб кетди. Бу ҳақда Украина Ташқи ишлар вазирлиги хабар берди.
“Украина Ташқи ишлар вазирлиги чуқур қайғу билан 2023 йил 13 август куни тажрибали ва юқори малакали дипломат, Украинанинг Арманистондаги муваққат ишлар вакили Александр Анатолевич Сенченконинг фожиали вафот этгани ҳақида хабар беради”, — дейди вазирлик.
Аввалроқ Севан кўлида бир киши ҳалок бўлгани ҳақида Арманистон оммавий ахборот воситалари хабар берганди. Унда 13 август куни маҳаллий вақт билан соат 20:17 да навбатчи қутқарувчилар кўлда чўмилаётган фуқаронинг ғойиб бўлганини пайқагани айтилган.
“Қутқарувчилар ёрдамга шошилган, фуқарони сувдан олиб чиққан. Ҳодиса жойига етиб келган тез тиббий ёрдам бригадаси эса эркакнинг ўлганини маълум қилганди”, — дейилган хабарда.
Кейинчалик оммавий ахборот воситалари марҳум Украинанинг Арманистондаги элчисининг маслаҳатчиси бўлганини хабар қилган.
Александр Сенченко Ташқи ишлар вазирлигида 2003 йилдан бери ишлаб келган. Дипломатик фаолияти давомида у вазирликнинг биринчи ҳудудий бошқармасида, Евро-Атлантика ҳамкорлик департаментида ишлаган, шунингдек, Арманистонда узоқ муддатли хизмат сафарларда бўлган.
Изоҳ (0)