Eron huquq-tartibot idoralari xodimlari 18 yoshga to‘lmagan hijob o‘ramagan qizlarni ushlab, politsiya bo‘limiga olib bormaydi. Bu haqda Eron parlamenti spikeri Muhammad Bag‘ir G‘olibaf xabar berdi.
“Qonun loyihasining hijobga oid moddalarida 18 yoshga to‘lmagan ayolni hatto chaqirib, politsiya bo‘limiga olib ketib ham bo‘lmaydi. Qonun buzilgan taqdirda ular politsiya bo‘limiga olib ketilishi butunlay yolg‘on”, — deydi G‘olibaf.
Eron jinoyat kodeksiga ko‘ra, ro‘mol o‘ramagan ayollar jarima va 10 kundan 2 oygacha qamoq jazosiga tortiladi.
Shuningdek, davlat xizmatidan bo‘shatish, chet elga chiqishni cheklash, mulkni musodara qilish kabi ma’muriy choralar ham qo‘llanilishi mumkin.
Hijob kiyishni rad etishga undash kabi jiddiy qonunbuzarliklar uchun uzoq muddatli qamoq jazosi — 1 yildan 10 yilgacha belgilanishi mumkin.
Hijobsiz ayollar “aqlli kameralar” yordamida topiladi
Aprel oyi boshida Eron politsiyasi jamoat joylariga “aqlli kameralar” o‘rnatishni boshlagani ma’lum bo‘ldi. Reuters xabariga ko‘ra, bunday qurilmalar Eron politsiyasiga boshi ochiq ayollarni aniqlash imkonini beradi. Shundan so‘ng “qoidabuzarlarga buning oqibati haqida ogohlantiruvchi matnli xabarlar” keladi. Eronning “Mizan” sud axborot agentligi xabariga ko‘ra, bu harakatlar “hijob qonuniga qarshilik ko‘rsatishning oldini olishga” qaratilgan.
Izoh (0)