Xorazmga 2023-yil yakuniga qadar 100 ta yangi avtobus olib kelinadi. Bu haqda Transport vazirligi matbuot xizmati xabar berdi.
Qayd etilishicha, viloyatda yo‘lovchi tashish faoliyati bilan shug‘ullanuvchi “Bunyodyo‘lovchitashish” MCHJ Xitoyning Zhongtong Bus Holding Co., Ltd. zavodi bilan shahar yo‘nalishlari uchun 100 ta avtobus sotib olish bo‘yicha shartnoma imzolagan. Mazkur shartnomaga muvofiq avtobuslar 2023-yilning yakuniga qadar Xorazm viloyatiga olib kelinishi rejalashtirilgan.
O‘zbekiston prezidentining “Jamoat transporti tizimini isloh qilish chora-tadbirlari to‘g‘risida”gi PQ–59-sonli qarorida belgilangan vazifalar ijrosini ta’minlash maqsadida Xorazm viloyati transport boshqarmasi boshlig‘i R.Babayev tashabbuskor tadbirkorlar bilan birgalikda ayni damda Xitoyda xizmat safarida bo‘lib turibdi.
Xizmat safari davomida Zhongtong Bus Holding Co., Ltd. zavodi faoliyati bilan tanishib, sotib olinadigan avtobuslarning yetkazib berilishi, mazkur avtobuslarga servis xizmati ko‘rsatish va doimiy hamkorlik aloqalarini yo‘lga qo‘yish yuzasidan zavod vakillari bilan uchrashuv o‘tkazilgan.
Prezident Shavkat Mirziyoyev o‘zining Oliy Majlis va O‘zbekiston xalqiga yo‘llagan murojaatnomasida jamoat transporti mutlaqo o‘zgarishi haqida aytgan edi. Shundan so‘ng aprel oyida Toshkentga Xitoydan 268 ta avtobus va elektrobuslar olib kelindi.
May oyida Buxoroga yangi 100 ta avtobus va mikroavtobus, iyul boshida Sirdaryo viloyatiga esa 160 ta yangi avtobus olib kelinishi ma’lum bo‘ldi. Avvalroq “Toshshahartransxizmat”ga yo‘lovchilarni tashishda ko‘riladigan zararlarni qoplash uchun 18 milliard so‘m ajratilgani, Toshkentdagi 32 ta avtobus yo‘nalishida “kunlik plan” bekor qilingani haqida xabar berilgan edi.
Izoh (0)