Energetika vazirligi va Bojxona qo‘mitasi ayrim joylarda quyosh panellarini o‘rnatishda ko‘zbo‘yamachilikka yo‘l qo‘yilayotgan, bunday panellar “ijaraga berilayotgani” aytilgan xabarga munosabat bildirdi.
Iqtisodchi Otabek Bakirov o‘zining Telegram kanalida “Quyosh panellari uchun yagona identifikator generatsiya bo‘lishi kerak” sarlavhali postni eʼlon qildi. Unda muallif “Yashil energiya” axborot tizimining real voqelikni aks ettirishini shubha ostiga olgan.
Munosabatda qayd etilishicha, 12-avgust kuniga qadar respublika bo‘yicha jami 41 885 ta obyektga 267,3 megavatt quvvatli quyosh panellari o‘rnatildi.
Shundan:
- ijtimoiy soha va davlat idoralarining 7 378 ta obyektiga 144,9 megavatt quvvatga teng bo‘lgan;
- tadbirkorlik subyektlarining 7 452 ta bino-inshootiga 72,8 megavatt quvvatga teng bo‘lgan;
- aholining 26 891 xonadoniga 47,1 megavatt quvvatga teng bo‘lgan;
- 2023-yilda foydalanishga topshiriladigan ko‘p qavatli uylarning 164 tasiga 2,4 megavatt quvvatga teng bo‘lgan quyosh panellari o‘rnatilib, ishchi holatiga keltirilgan.
Bularning barchasi ayni kunlarda “Hududiy elektr tarmoqlari” tomonidan tizimga ulanib, isteʼmolchilarga arzon, sifatli, eng muhimi, ekologik toza elektr energiyasi yetkazib berayotgan quyosh panellaridir.
Ta’kidlanishicha, “Yashil energiya” axborot tizimi bazasiga o‘rnatib qo‘yilgan emas, balki tizimga ulanib, allaqachon generatsiya bera boshlagan quyosh panellarigina kiritiladi. Bundan maqsad — tizimda ko‘zbo‘yamachilik va soxtakorliklarga yo‘l qo‘ymaslik.
“Bu borada ro‘yobga chiqarilayotgan ishlarni nazorat qilib borish maqsadida bojxona xodimlaridan iborat ishchi guruhlar tomonidan istalgan shartli obyektga oldindan maʼlum qilinmagan reydlar amalga oshirilib, vaziyat joyiga chiqilgan holda o‘rganib borilmoqda va shu asosda qatʼiy monitoring ishlari olib borilmoqda”, — deyiladi munosabatda.
Mazkur yo‘nalishda obyektlarga o‘rnatilayotgan qayta tiklanuvchi energiya manbalari qurilmalari va ular orqali ishlab chiqarilayotgan elektr energiya to‘g‘risidagi maʼlumotlar bojxona organlari tomonidan ishlab chiqilgan “Yashil energiya” axborot tizimida muntazam qayd etib borilmoqda.
Tizim Soliq qo‘mitasining “Keshbek”, “Hududiy elektr tarmoqlari” AJning “ASKUE” axborot tizimlariga, “Elektron hukumat” platformasi orqali esa Kadastr agentligining Maʼlumotlar bazasi bilan integratsiya qilingan.
Qayd etilishicha, bugungi kunda O‘zbekiston jismoniy shaxslardan elektr energiyasini sotib olish tarifi bo‘yicha eng yuqori o‘rinlarda bo‘lib, aholimiz tomonidan o‘rnatilgan quyosh panellari orqali ishlab chiqarilgan elektr energiyasining o‘z ehtiyojidan ortiqcha qismi uchun har bir kilovatt/soatga 1 000 so‘mdan subsidiya bermoqda.
Ayni paytgacha 4 ming 534 ta xonadon bilan shartnomalar tuzilgan bo‘lib, ulardan tarmoqqa 720 ming kilovatt/soat elektr energiyasi qabul qilib olingan.
“To‘g‘ri, guruch kurmaksiz bo‘lmaydi. Joylarda ko‘zbo‘yamachilik qilishga, davlatni ham, o‘zini ham aldashga urinishlar bo‘lishi tabiiy hol. Ammo shahar bedarvoza emas. Qatʼiy taʼkidlaymizki, aniqlangan bu kabi holatlarga zudlik bilan huquqiy baho berilib, bunga yo‘l qo‘ygan shaxslarga nisbatan tegishli taʼsir choralari ko‘rib kelinmoqda.
Biz muallifdan postda yozilgani kabi holatlar yuz berganiga shaxsan guvoh bo‘lsa, Bojxona qo‘mitasining 1108 hamda ‘Hududiy elektr tarmoqlari’ AJning 1154 raqamli ishonch telefonlariga qo‘ng‘iroq qilishini yoki huquqni muhofaza etuvchi organlarga murojaat qilishini so‘raymiz”, — deyiladi xabarda.
16-fevral kuni “2023-yilda qayta tiklanuvchi energiya manbalarini va energiya tejovchi texnologiyalarni joriy etishni jadallashtirish chora-tadbirlari to‘g‘risida”gi prezident qarori imzolangandi. Unda qayta tiklanuvchi energiya manbalarini o‘rnatgan shaxslar qator soliqlardan ozod etilishi belgilangandi.
Izoh (0)