Surxondaryo viloyati Sherobod tumanida uch yoshli o‘g‘lini o‘ldirib, jasadini tashlandiq ariqqa tashlab ketgan otaga hukm o‘qildi.
Ma’lum qilinishicha, holat 16-fevral kuni sodir bo‘lgan. Tumanning “Nurtepa” mahallasida yashovchi 1996-yilda tug‘ilgan erkak 2018-yil dekabr oyida o‘zidan ikki yosh kichik qiz bilan turmush qurgan. Ular 2021-yilda o‘g‘il farzandli bo‘lgan. Oilaviy kelishmovchiliklar sababli 2022-yilning fevral oyida ayoli o‘g‘li bilan otasining uyiga ketib qolgan.
Oradan 8 oy o‘tib ayol farzandi uchun aliment talab qilgan. Aliment to‘lashdan talvasaga tushgan erkak farzandi o‘ziniki ekanligidan gumon qila boshlagan. Shundan so‘ng 16-fevral kuni soat 18:00 atrofida spirtli ichimlik ta’sirida qaynotasining uyiga borgan. Uning yo‘qligidan foydalanib, ayoli va o‘g‘lini o‘z uyiga olib kelgan. Uch yoshli o‘g‘lini qasddan o‘ldirib, jasadini tashlandiq ariqqa tashlab ketgan.
Mazkur holat Jinoyat ishlari bo‘yicha Sherobod tuman sudida ko‘rib chiqilgan bo‘lib, unda sudlanuvchiga Jinoyat kodeksining 97-moddasi (qasddan odam o‘ldirish) 2-qismi “v” bandi bilan 16 yil muddatga ozodlikdan mahrum qilish jazosi tayinlangan.
Izoh (0)