Сурхондарё вилояти Шеробод туманида уч ёшли ўғлини ўлдириб, жасадини ташландиқ ариққа ташлаб кетган отага ҳукм ўқилди.
Маълум қилинишича, ҳолат 16 февраль куни содир бўлган. Туманнинг “Нуртепа” маҳалласида яшовчи 1996 йилда туғилган эркак 2018 йил декабрь ойида ўзидан икки ёш кичик қиз билан турмуш қурган. Улар 2021 йилда ўғил фарзандли бўлган. Оилавий келишмовчиликлар сабабли 2022 йилнинг февраль ойида аёли ўғли билан отасининг уйига кетиб қолган.
Орадан 8 ой ўтиб аёл фарзанди учун алимент талаб қилган. Алимент тўлашдан талвасага тушган эркак фарзанди ўзиники эканлигидан гумон қила бошлаган. Шундан сўнг 16 февраль куни соат 18:00 атрофида спиртли ичимлик таъсирида қайнотасининг уйига борган. Унинг йўқлигидан фойдаланиб, аёли ва ўғлини ўз уйига олиб келган. Уч ёшли ўғлини қасддан ўлдириб, жасадини ташландиқ ариққа ташлаб кетган.
Мазкур ҳолат Жиноят ишлари бўйича Шеробод туман судида кўриб чиқилган бўлиб, унда судланувчига Жиноят кодексининг 97-моддаси (қасддан одам ўлдириш) 2-қисми “в” банди билан 16 йил муддатга озодликдан маҳрум қилиш жазоси тайинланган.
Изоҳ (0)