AQSH prezidenti Jo Bayden Xitoyning iqtisodiy va demografik muammolari ikkinchi yirik iqtisodga ega davlatni butun dunyoga tahdid soluvchi “soatli bomba”ga aylantirganidan xavotir bildirdi.
Yuta shtatida o‘z saylovoldi kampaniyasi uchun mablag‘ yig‘ish tadbirida nutq so‘zlagan Bayden Xitoyda tug‘ilish sur’ati sekinlashgani va pensiya yoshidagilar soni mehnatga layoqatli yoshdagilar sonidan oshib ketgani sababli Pekin “muammoga duch kelganini” aytdi.
“Ko‘p hollarda Xitoy chiqillayotgan soatli bomba. Ularda ishsizlik darajasi eng yuqori. Demak, ularda qandaydir muammolar bor. Bu yaxshi emas, chunki yomon odamlar muammoga duch kelganda, yomon ishga qo‘l uradi”, — dedi Bayden.
Bu mulohazalar Baydenning AQSHga bosh geosiyosiy raqib bo‘lgan Xitoy haqidagi eng tashvishli bayonotlaridan biri bo‘lgani aytilmoqda. Amerika yetakchisi Xitoyning iqtisodiy faoliyati va Janubiy Xitoy dengizidagi agressiyasi o‘rtasidagi nozik chegaradan o‘tishga urinmoqda, shu bilan birga Xitoy yetakchilari bilan diplomatik yaqinlashuvga intilmoqda, deydi ekspertlar.
Baydenning so‘zlariga ko‘ra, Vashington Pekin bilan mojaroni istamaydi, balki uning harakatlarini diqqat bilan kuzatib boryapti. Misol uchun, u Xitoyning “Bir kamar — bir yo‘l” infratuzilmasini moliyalashtirish tashabbusini “qarz va qarmoq” deb ataydi, chunki unda boshqa davlatlar pul evaziga qabul qilishi kerak bo‘lgan shartlar bor.
Shu hafta Bayden ma’muriyati AQSHning Xitoyga sarmoyasini cheklash to‘g‘risida uzoq kutilgan farmonni chiqardi, ammo prezidentning Xitoy hukumati bilan munosabatlarni yaxshilashga qaratilgan sa’y-harakatlari fonida loyihaning dastlabki variantidagi choralar qisqartirildi.
Izoh (0)