Eron va AQSH har ikki tomonda besh nafardan mahbusni ozod qilish bo‘yicha kelishuvga erishdi, birinchi qadam ularni uy qamog‘iga o‘tkazish bo‘ldi, deb ma’lum qildi Tehronning Birlashgan Millatlar Tashkilotidagi missiyasi.
“Uchinchi tomon vositachiligida tuzilgan gumanitar hamkorlik to‘g‘risidagi bitim doirasida Eron va Qo‘shma Shtatlar besh mahbusni o‘zaro ozod qilishga va afv etishga kelishib oldi. Bu mahbuslarning qamoqxonadan tashqariga ko‘chirilishi ushbu kelishuvni amalga oshirishdagi muhim dastlabki qadamdir”, — deya eronlik diplomatlarning so‘zlaridan iqtibos keltirgan Reuters.
AQSH Davlat kotibi Entoni Blinkenning aytishicha, Davlat departamenti Eronda hibsda saqlangan amerikaliklar bilan aloqaga chiqqan.
“Ular qamoqdan chiqqanidan juda xursand. Ishonchim komilki, bu mahbuslar qora tushining yakuni. Ularni uyga olib kelish uchun hali ko‘p ish qilish kerak”, — dedi Blinken.
Eron tashqi ishlar vaziri o‘rinbosari Ali Bageri Kanining aytishicha, kelishuv doirasida AQSHga qo‘yilgan talablar orasida eronliklarni AQSH qamoqxonalaridan ozod qilishdan tashqari, Eronning “milliardlab dollarlik” aktivlarini blokdan chiqarish ham bor. Uning so‘zlariga ko‘ra, Vashington kelishuv shartlarini bajarish bo‘yicha “zaruriy majburiyatni” olgan.
Reuters va The New York Times gazetalarining masaladan xabardor manbalariga tayanib yozishicha, Eron Janubiy Koreyadagi 6 milliard dollar mablag‘i blokdan chiqarilganidan keyin, amerikaliklarni ozod qiladi. Reuters manbalaridan biri AQSH fuqarolarining Erondan chiqib ketishiga bir necha hafta kerak bo‘lishi mumkinligini aytdi.
Manbaning qayd etishicha, blokdan chiqarilgach, mablag‘lar Janubiy Koreya banklaridan boshqa moliya muassasasiga o‘tkaziladi. Ulardan cheklangan hisob raqamlariga o‘tkazmalarda va faqat oziq-ovqat yoki dori-darmon sotib olish kabi insonparvarlik maqsadlarida foydalanish mumkin.
Eronning Tasnim axborot agentligi ma’lum qilishicha, mablag‘lar avval Janubiy Koreya valyutasidan yevroga konvertatsiya qilinadi, so‘ngra Eron foydalana oladigan Qatardagi hisob raqamiga yuboriladi.
Blinken, kelishuv Eronga qo‘yilgan sanksiyalarni yengillashtirishini anglatmasligini ta’kidladi:
“Biz barcha sanksiyalarimizni qo‘llashda davom etamiz. Eronning mintaqada va undan tashqarida beqarorlashtiruvchi faoliyatiga qat’iy qarshilik ko‘rsatishda davom etamiz. Bu sa’y-harakatlarning hech biri o‘zgarmaydi”.
Izoh (0)