АҚШ президенти Жо Байден Хитойнинг иқтисодий ва демографик муаммолари иккинчи йирик иқтисодга эга давлатни бутун дунёга таҳдид солувчи “соатли бомба”га айлантирганидан хавотир билдирди.
Юта штатида ўз сайловолди кампанияси учун маблағ йиғиш тадбирида нутқ сўзлаган Байден Хитойда туғилиш суръати секинлашгани ва пенсия ёшидагилар сони меҳнатга лаёқатли ёшдагилар сонидан ошиб кетгани сабабли Пекин “муаммога дуч келганини” айтди.
“Кўп ҳолларда Хитой чиқиллаётган соатли бомба. Уларда ишсизлик даражаси энг юқори. Демак, уларда қандайдир муаммолар бор. Бу яхши эмас, чунки ёмон одамлар муаммога дуч келганда, ёмон ишга қўл уради”, — деди Байден.
Бу мулоҳазалар Байденнинг АҚШга бош геосиёсий рақиб бўлган Хитой ҳақидаги энг ташвишли баёнотларидан бири бўлгани айтилмоқда. Америка етакчиси Хитойнинг иқтисодий фаолияти ва Жанубий Хитой денгизидаги агрессияси ўртасидаги нозик чегарадан ўтишга уринмоқда, шу билан бирга Хитой етакчилари билан дипломатик яқинлашувга интилмоқда, дейди экспертлар.
Байденнинг сўзларига кўра, Вашингтон Пекин билан можарони истамайди, балки унинг ҳаракатларини диққат билан кузатиб боряпти. Мисол учун, у Хитойнинг “Бир камар — бир йўл” инфратузилмасини молиялаштириш ташаббусини “қарз ва қармоқ” деб атайди, чунки унда бошқа давлатлар пул эвазига қабул қилиши керак бўлган шартлар бор.
Шу ҳафта Байден маъмурияти АҚШнинг Хитойга сармоясини чеклаш тўғрисида узоқ кутилган фармонни чиқарди, аммо президентнинг Хитой ҳукумати билан муносабатларни яхшилашга қаратилган саъй-ҳаракатлари фонида лойиҳанинг дастлабки вариантидаги чоралар қисқартирилди.
Изоҳ (0)