Britaniyalik milliarder Richard Brenson tomonidan asos solingan Virgin Galactic kompaniyasi kosmik sayyohlardan iborat birinchi ekipajini koinot chegarasiga olib chiqib, so‘ng ularni yerga qaytardi. Parvoz kompaniyaning YouTube kanalida translyatsiya qilindi.
Parvoz fonida Virgin Galactic aksiyalari 1,92 foizga oshib, har bir aksiya uchun 3,44 dollarni tashkil qilgan. 2023-yil boshidan beri kompaniya aksiyalari 3 foizga arzonlashgandi.
Ekipaj tarkibida Parkinson kasalligidan aziyat chekayotgan 80 yoshli britaniyalik sobiq sportchi Jon Gudvin ham bor edi. U kosmosda bo‘lgan eng keksa britaniyalikka aylandi.
Bundan tashqari, ekipaj tarkibida kosmosga lotereya yutib olgan antigua va barbudalik Keysha Shahaf va uning qizi Anastasiya Mayers, shuningdek, Virgin Galactic katta astronavt instruktori Bet Mozes ham bor edi.
Bu Virgin Galactic’ning koinotga ikkinchi marta parvozidir. Birinchi parvoz 29-iyun kuni bo‘lib o‘tgan.
O‘shanda ikki uchuvchi, Italiya harbiy-havo kuchlarining ikki xodimi, Italiya milliy tadqiqot kengashining bir muhandisi va Virgin Galactic kompaniyasining bir xodimidan iborat olti kishilik ekipaj kosmosga chiqqan.
Izoh (0)