INRI nomli Yevangelist ruhiy cherkovining rahbari Elayja Ayodele AQSH prezidenti Jo Baydenni Nigerga bostirib kirishdan ogohlantirdi. Bu haqda Daily Post xabar berdi.
Ayodele Nigerga bostirib kirish “Xudoga qarshi kurashish bilan barobar” ekanidan ogohlantirdi va bu uchinchi jahon urushiga olib kelishi mumkinligini ta’kidladi.
Ogohlantirishga AQSH davlat kotibi o‘rinbosari vazifasini bajaruvchi Viktoriya Nulandning Nigerdagi isyonchilardan ag‘darilgan prezidentni hokimiyatga qaytarishni so‘ragani sabab bo‘lgan.
Ayodele AQSHning Nigerga ehtimoliy bostirib kirishi “shaytoniy va terroristik harakat” ekanini aytdi. U Baydenni Niger xalqiga demokratiyani qaytarishga majburlashdan ko‘ra, o‘z kelajagini hal qilishiga ruxsat berishga chaqirdi.
“AQSH Nigerga bostirib kirsa, bu shaytoniy va terroristik harakat bo‘ladi. Bayden Xudoning g‘azabini qidirayotganini anglatadi. Bu uchinchi jahon urushini boshlash uchun vositadir”, — deydi u.
Shuningdek, u Nigerga bostirib kirishga urinish 2024-yilgi AQSH prezidentlik saylovlari oldidan Bayden faoliyatining qulashini angaltishini ta’kidladi.
Nigerda harbiy to‘ntarish
Nigerda 26-iyul kuni harbiy to‘ntarish sodir bo‘ldi. Prezident gvardiyasi davlat rahbari Muhammad Bazumni hokimiyatdan chetlatdi. Ikki kundan so‘ng prezident gvardiyasi boshlig‘i general Abdurahmon Tchiani o‘zini yangi davlat rahbari deb e’lon qildi.
ECOWAS mamlakatlari Nigerga harbiylarni kiritishga tayyorligini e’lon qildi. Bunga javoban davlat to‘ntarishlari natijasida hokimiyatga kelgan harbiylar tomonidan boshqariladigan Mali va Burkina-Faso “Niger ishlariga har qanday harbiy aralashuv ularga qarshi urush eʼlon qilish bilan barobar bo‘lishini” bildirdi.
Izoh (0)