O‘zbekistonning qaysi hududidan ko‘proq odam chet elga ko‘chib ketayotgani ma’lum qilindi

Statistika agentligi bergan ma’lumotlarga ko‘ra, 2023-yil yanvar—iyun oylarida O‘zbekistondan xorijga ko‘chib ketganlar soni 113,7 ming kishini tashkil etdi. Shundan erkaklar soni 48 ming nafar, ayollar — 65,7 ming nafar. Xususan, respublikaning shahar joylaridan 78,6 ming, qishloqlardan 35,1 ming o‘zbekistonlik chet elga yashash uchun ketgan.

Xorijiy mamlakatlarga ko‘chib ketganlarning asosiy qismi Qozog‘iston (78,6 foiz), Rossiya (17,6 foiz), Qirg‘iziston (0,5 foiz), Turkmaniston (0,3 foiz), Tojikiston (0,2 foiz) va boshqa mamlakatlar (2,8 foiz) hissasiga to‘g‘ri kelgan.

Jumladan, yarim yil ichida eng ko‘p o‘zbekistonliklar Qozog‘iston (7 ming 80 nafar) va Rossiyaga (1 ming 584 kishi) doimiy yashash uchun ko‘chib ketgan.

Yarim yil mobaynida ko‘chib ketganlarning 82,3 foizi mehnatga layoqatli yoshdagilar, 9,3 foizi mehnatga layoqatli yoshdan kichiklar, 8,4 foizi mehnatga layoqatli yoshdan kattalar hissasiga to‘g‘ri kelmoqda.

Ko‘chib ketganlarning o‘sish surʼati eng yuqori darajasi Qoraqalpog‘istonda kuzatilgan. Shu bilan birga, Navoiy, Buxoro, Xorazm viloyati hamda Toshkent shahri aholisi ham eng ko‘p ko‘chib ketganlar qatoridan joy olgan.

Ko‘chib ketganlarning o‘sish surʼati nisbatan past darajasi Toshkent, Namangan, Qashqadaryo, Jizzax va Sirdaryo viloyatlarida qayd etilgan.

Ko‘chib ketganlar soni — ko‘chib ketganlarning absolyut miqdori, yaʼni muayyan hududdan uning tashqarisiga ko‘chib ketganlardan iborat. Ichki ishlar organlari tomonidan aholini yashash joyi bo‘yicha ro‘yxatdan chiqarishda tuziladigan ko‘chib ketishni statistik hisobga olish varaqalarini qayta ishlash natijasida aniqlanadi.