Raqamli texnologiyalar vaziri Sherzod Shermatov O‘zbekistonda internet tezligi past bo‘lgani uchun qaysi mobil aloqa operatoriga ko‘proq shikoyat kelib tushganini ma’lum qildi.
“O‘zkomnazorat” inspeksiyasining 1144 ishonch raqamiga tushgan murojaatlar jadvalidan ko‘rish mumkinki, eng past tezlikka ega bo‘lgan operator ustidan foydalanuvchilar tomonidan eng ko‘p shikoyat tushgan.
“Bu esa Beeline tomonidan tarmoqni rivojlantirishga ko‘proq sarmoya kiritish zarurligini ko‘rsatadi”, — deb yozadi vazir.
Shu bilan birga, Sherzod Shermatov odatda 100 foiz xorijiy ulushga ega xususiy korxonada sifat yaxshi bo‘lishi kutilishi, bu holatda esa aksi — davlat ulushidagi “O‘ztelekom” g‘olib bo‘layotganini qayd etgan. “Buning asosiy sababi aynan tarmoq rivoji uchun ‘O‘ztelekom’ tomonidan amalga oshirilayotgan investitsiyalardir”, — deydi u.
2022-yil dekabrda raqamli texnologiyalar vaziri Sherzod Shermatov O‘zbekiston aholisining internet xizmatidan foydalanuvchilari soni 31 milliondan ortganini ma’lum qilgandi. Vazirning qayd etishicha, xalqaro va shaharlararo telekommunikatsiya tarmog‘ini rivojlantirish maqsadida xalqaro internet tarmog‘iga ulanishning umumiy o‘tkazuvchanlik qobiliyati 2,6 barobar oshirilib, 3 200 Gbit/sekundga yetkazilgan.
Respublika 2022-yilda dunyodagi simli internet tezligi bo‘yicha reytingda 155-o‘rinda bo‘lgan. 2023-yilda esa natijalar o‘zgarib, 131-o‘ringa ko‘tarilgan. Yaʼni o‘tgan yilgi reytingga nisbatan 24 pog‘onaga o‘sish bo‘lgan. O‘zbekistondagi simli internet tezligi 21,67 Mbit/s ekani qayd etilgan.
Shuningdek, O‘zbekistonda 2023-yil mart oyidan boshlab mobil internet tezligi oshirilishi va mamlakat bo‘ylab 5G texnologiyasi joriy etilishi to‘g‘risida xabar berilgan edi.
Izoh (0)