Рақамли технологиялар вазири Шерзод Шерматов Ўзбекистонда интернет тезлиги паст бўлгани учун қайси мобил алоқа операторига кўпроқ шикоят келиб тушганини маълум қилди.
“Ўзкомназорат” инспекциясининг 1144 ишонч рақамига тушган мурожаатлар жадвалидан кўриш мумкинки, энг паст тезликка эга бўлган оператор устидан фойдаланувчилар томонидан энг кўп шикоят тушган.
“Бу эса Beeline томонидан тармоқни ривожлантиришга кўпроқ сармоя киритиш зарурлигини кўрсатади”, — деб ёзади вазир.
Шу билан бирга, Шерзод Шерматов одатда 100 фоиз хорижий улушга эга хусусий корхонада сифат яхши бўлиши кутилиши, бу ҳолатда эса акси — давлат улушидаги “Ўзтелеком” ғолиб бўлаётганини қайд этган. “Бунинг асосий сабаби айнан тармоқ ривожи учун ‘Ўзтелеком’ томонидан амалга оширилаётган инвестициялардир”, — дейди у.
2022 йил декабрда рақамли технологиялар вазири Шерзод Шерматов Ўзбекистон аҳолисининг интернет хизматидан фойдаланувчилари сони 31 миллиондан ортганини маълум қилганди. Вазирнинг қайд этишича, халқаро ва шаҳарлараро телекоммуникация тармоғини ривожлантириш мақсадида халқаро интернет тармоғига уланишнинг умумий ўтказувчанлик қобилияти 2,6 баробар оширилиб, 3 200 Гбит/секундга етказилган.
Республика 2022 йилда дунёдаги симли интернет тезлиги бўйича рейтингда 155-ўринда бўлган. 2023 йилда эса натижалар ўзгариб, 131-ўринга кўтарилган. Яъни ўтган йилги рейтингга нисбатан 24 поғонага ўсиш бўлган. Ўзбекистондаги симли интернет тезлиги 21,67 Мбит/с экани қайд этилган.
Шунингдек, Ўзбекистонда 2023 йил март ойидан бошлаб мобил интернет тезлиги оширилиши ва мамлакат бўйлаб 5G технологияси жорий этилиши тўғрисида хабар берилган эди.
Изоҳ (0)