Хитойнинг Россиядаги элчихонаси маълум қилишича, Россия ҳуқуқ-тартибот идоралари беш нафар Хитой фуқаросини чегарада бир неча соат давомида сўроқ қилган ва уларга киришга рухсат бермаган. Элчихона бундай хатти-ҳаракатларни “шафқатсиз” деб атади. Бу ҳақда Хитойнинг WeChat ижтимоий тармоғига жойланган дипломатлар баёнотида айтилади, деб ёзмоқда Bloomberg.
Элчихона маълумотларига кўра, 29 июль куни беш нафар Хитой фуқароси Қозоғистондан Россияга киришга уринган. Чегарада улар “тўрт соат давомида қайта-қайта сўроққа тутилган”, шундан сўнг уларга мамлакатга киришга рухсат берилмаган. Уларнинг туристик визалари бекор қилинган, дейди дипломатлар.
“Россия ҳуқуқ-тартибот идораларининг ушбу ҳодиса билан боғлиқ шафқатсиз ва ҳаддан ошган ҳаракатлари Хитой фуқароларининг қонуний ҳуқуқ ва манфаатларини жиддий равишда бузди”, — дейилади хабарда.
Элчихона воқеа акс этган видеони кўриб чиққанидан сўнг Россия Ташқи ишлар вазирлиги, Федерал хавфсизлик хизмати ва чегара хизматига ўз вакилларини юбориб, ҳодиса сабабларини тушунтиришни ва “бундай воқеалар келгусида такрорланмаслигига кафолат беришни талаб қилган”.
“Бу Хитой—Россия дўстлигининг умумий кўринишига ва мамлакатлар ўртасидаги дўстона алоқаларнинг ўсиб бораётган тенденциясига зиддир”, — деди элчихона.
Россия томони ҳозирча воқеа юзасидан изоҳ бермади.
Изоҳ (0)