Toshkent shahri Mirzo Ulug‘bek tumanida 32 yoshli ayol liftda qamalib, vafot etgani xabar qilingandi. Kambag‘allikni qisqartirish va bandlik vazirligi ayolga tovon puli to‘lanishi yuzasidan ma‘lumot berdi.
Vazirlar Mahkamasining 1997-yil 6-iyundagi qarori bilan tasdiqlangan nizomga asosan ishlab chiqarishdagi va xodimlar bilan ish vaqtida sodir bo‘lgan baxtsiz hodisa yuzasidan ish beruvchi darhol hududiy mehnat organiga xabar berishi kerakligi ko‘rsatib o‘tilgan. Ushbu nizom talablariga asosan xodimning jarohatiga qarab, qolaversa, og‘irlik darajasidan qat’i nazar, guruhiy baxtsiz hodisalar Mehnat inspeksiyasi tomonidan maxsus tekshirilishi ko‘rsatib o‘tilgan.
Bunda tekshirish jarayoniga korxona tomonidan berilgan vakillar qatnashishi belgilab o‘tilgan. Jumladan, O‘zbekiston pochtasi Toshkent filiali, Yashnobod tumani, Parkent ko‘chasi 74-uyda joylashgan 7-aloqa bo‘limida xat-xabar tarqatuvchi ayol bilan sodir bo‘lgan baxtsiz hodisa yuzasidan korxona tomonidan inspeksiyaga xabar berilgan. Hodisani tekshirish uchun komissiya a’zolari vakillari ham taqdim etilgan.
Toshkent shahar kambag‘allikni qisqartirish va bandlik bosh boshqarmasi Mehnat nazorati inspeksiyasi tomonidan ushbu hodisani maxsus tekshirish ishlari boshlangan.
Liftda qamalib vafot etgan ayol voqeasi
Ayol 24-iyul kuni soat 14:50 larda ko‘p qavatli uyning liftiga kirib, qaytib chiqmagan. 26-iyul kuni marhumaning yaqin qarindoshlari tomonidan ichki ishlar idorasiga bedarak yo‘qolganligi yuzasidan xabar berilgan, 27-iyul kuni esa uning jasadi lift ichidan topilgan. Marhuma 4 kun davomida lift ichida qolib ketgan.
Ijtimoiy tarmoqlarda tarqalgan xabarlarda odam o‘limi bilan yakunlangan ushbu ko‘ngilsizlikka elektr energiyasi ta’minotidagi doimiy uzilishlar sabab qilib ko‘rsatilgandi. Tekshirish davomida ushbu lift bir necha kundan buyon ishlamayotgani, oldin ham ishlamay qolishi holatlari ko‘p marotaba bo‘lgani haqida uy yashovchilari tomonidan tushuntirishlar berilgan. Shuningdek, voqea joyida xolis surishtiruv olib borgan OAV vakillari, jumladan, “Daryo” muxbirining videoreportajlarida ham o‘z tasdig‘ini topgan.
Sanoat xavfsizligi davlat qo‘mitasi “28-iyul kuni mutaxassislar tomonidan joyiga chiqib o‘rganilganida, lift qurilmasining xavfsizlik moslamalari ishchi holatdaligi yuzasidan birlamchi ko‘rik ishlari amalga oshirildi va ularni ishchi holatdaligi aniqlandi” deb rasmiy munosabat bildirgan.
Holat yuzasidan Jinoyat kodeksining 186-moddasi (xavfsizlik talablariga javob bermaydigan tovarlarni o‘tkazish maqsadini ko‘zlab ishlab chiqarish, saqlash, tashish yoxud o‘tkazish, ishlar bajarish yoki xizmatlar ko‘rsatish) bilan jinoyat ishi qo‘zg‘atildi.
Bosh prokuraturaning bildirishicha, tergov o‘tkazish yo‘li bilan qonuniy qaror qabul qilinishi ta’minlanadi.
Izoh (0)