Tovlamachilik, firibgarlikda ayblanayotgan jurnalist va bloger Abduqodir Mo‘minov ishi bo‘yicha sud majlisi boshlangani haqida xabar berilgan edi. Oliy sud matbuot kotibining “Daryo”ga ma’lum qilishicha, blogerga nisbatan hukm chiqarildi.
Unga ko‘ra, bugun jinoyat ishlari bo‘yicha Mirobod tuman sudida Abduqodir Mo‘minov (1990-yilda Surxondaryo viloyatida tug‘ilgan, “Oynaga qarang” MCHJ rahbari, muqaddam sudlanmagan)ga oid jinoyat ishini ko‘rib chiqish bo‘yicha sud jarayoni yakunlanib, sud hukmi eʼlon qilindi.
Jinoyat ishlari bo‘yicha Mirobod tuman sudining raisi S.Sodiqov eʼlon qilgan hukmga ko‘ra, A. Mo‘minov fuqarolar L.M., F.K. va E.E.ning pul mablag‘larini firibgarlik yo‘li bilan egallash holatlari bo‘yicha jinoiy hodisa yuz bermagani hamda uning qilmishida jinoyat tarkibi bo‘lmagani sababli Jinoyat kodeksining 168-moddasi 3-qismi “b”, “v” bandlari bilan aybsiz deb topilib, reabilitatsiya etildi hamda jinoyat ishining shu qismlari Jinoyat-protsessual kodeksining 83-moddasi (reabilitatsiya uchun asoslar) 1, 2-bandlariga asosan tugatildi.
A.Mo‘minov Jinoyat kodeksining 141-1-moddasi (shaxsiy hayot daxlsizligini buzish) 2-qismi “a” bandi, 165-moddasi (tovlamachilik) 3-qismi “a” bandi, 168-moddasi (firibgarlik) 4-qismi “a” bandi, 189-moddasi (savdo yoki xizmat ko‘rsatish qoidalarini buzish) 1-qismi va 28,211-moddasi (pora berishda ishtirokchilik) 3-qismi “a” bandida nazarda tutilgan jinoyatlarni sodir etganlikda aybli deb topilib, unga Jinoyat kodeksining 45 (muayyan huquqdan mahrum qilish) va 57 (yengilroq jazo tayinlash) moddalarini qo‘llagan holda Jinoyat kodeksining 59 (bir necha jinoyat sodir etganlik uchun jazo tayinlash) va 61 (jazolarni qo‘shishning hisoblash qoidalari) moddalari tartibida 3 yil muddatga jurnalistik (blogerlik) faoliyati bilan shug‘ullanish huquqidan mahrum qilgan holda 7 yil 3 oy muddatga ozodlikdan mahrum qilish jazosi tayinlandi. Tayinlangan jazoni umumiy tartibli koloniyada o‘tash belgilandi.
Shuningdek, A.Mo‘minovdan jabrlanuvchilar foydasiga jinoyat oqibatida yetkazilgan moddiy va maʼnaviy zararni undirish belgilandi.
Birinchi instansiya hukmidan norozi taraflar qonunda belgilangan tartib va muddatda Toshkent shahar sudining appelyatsiya instansiyasiga shikoyat berish va protest keltirish huquqi mavjudligi maʼlum qilinadi.
Izoh (0)