“O‘zgidromet” dam olish kunlari harorat asta-sekin pasayishini ma’lum qildi.
Qayd etilishicha, 4—5-avgust kunlari O‘zbekiston bo‘yicha o‘rtacha issiq ob-havo saqlanib turadi. Havo harorati 35-38 daraja atrofida, ba’zi joylarda 40 darajagacha, janubda ba’zi joylarda 42 darajagacha issiq bo‘ladi.
Hududning katta qismida havo asosan biroz bulutli bo‘ladi, yog‘ingarchilik kutilmaydi. Faqat 5-avgust kuni shimoli-g‘arbiy hududlarga Janubiy Ural hududlaridan nisbatan nam va salqin havo massalari kirib kelishi boshlanadi. Qoraqalpog‘iston Respublikasi va Xorazm viloyatida 5-avgust kuni ba’zi joylarda qisqa muddatli yomg‘ir yog‘ishi, momaqaldiroq bo‘lishi mumkin, havo harorati 32-37 darajagacha pasayadi.
6-avgust, yakshanba kuni nisbatan nam va salqin havo massalari kirib kelishi respublikaning barcha hududlariga tarqaladi. Kunduzgi harorat barcha joylarda 30-35 darajagacha, janubda 35-38 darajagacha pasayadi. Bulutli ob-havo bo‘lishi kutilmoqda.
Respublika hududining katta qismida yog‘ingarchiliksiz ob-havo saqlanib turadi, faqat respublikaning tog‘oldi va tog‘li hududlarida, shuningdek, Buxoro, Navoiy viloyatlarida, kechasi esa Xorazm viloyatida ba’zi joylarda qisqa muddatli yomg‘ir yog‘ishi, momaqaldiroq bo‘lishi mumkin.
Toshkentda 4—6-avgust kunlari havo biroz bulutli bo‘ladi, vaqti-vaqti bilan o‘zgarib turadi, yog‘ingarchilik kutilmaydi. Harorat 38-40 darajadan 33-35 darajagacha asta-sekin pasayadi.
Avvalroq yomg‘ir yog‘ishi kutilayotgani sababli 6—9-avgust kunlari respublikaning tog‘oldi va tog‘li hududlarida sel-suv toshqini yuzaga kelishi mumkinligi xabar qilingandi.
Izoh (0)