Toshkent shahrida juda ko‘p miqdordagi noqonuniy topilgan mablag‘larni legallashtirish holatlari aniqlandi, deb xabar beradi Bosh prokuratura huzuridagi departament.
Bosh prokuratura huzuridagi departamentning Toshkent shahar boshqarmasi tomonidan fuqarolarning huquq va manfaatlarini himoya qilish yuzasidan tergovga qadar tekshiruvlar o‘tkazilgan. Tekshiruvda fuqaro U.P. va boshqalar 2022-yilda “I.A.” va “A.A.” MCHJni tashkil etib, 188 nafar fuqaroga muddatli to‘lov asosida avtomashina yetkazib berish bo‘yicha lizing shartnomasi asosida jami 9,8 milliard so‘mini dastlabki to‘lov sifatida qabul qilgani aniqlangan. Ular shundan 138 nafar fuqaroga avtomashina olib bermasdan, mijozlarning jami 946,2 million so‘mini plastik kartalariga o‘tkazib, naqdlashtirib olgan.
Xuddi shunday, “S.R.” MCHJ masʼul shaxslari 98 nafar fuqaro bilan muddatli to‘lov asosida avtomashina yetkazib berish bo‘yicha tuzilgan lizing shartnomasi asosida jami 4,7 milliard so‘mini dastlabki to‘lov sifatida qabul qilib, shundan 1,5 milliard so‘mini MCHJni norasmiy boshqarib kelgan N.T. va boshqalarning plastik kartalariga o‘tkazib naqdlashtirgan. Shuningdek, ular 462 million so‘mni “R.A.” MCHJning nizom jamg‘armasini shakllantirish uchun o‘tkazib, jinoiy yo‘l bilan topilgan daromadlarini legallashtirgan.
Mazkur holatlar yuzasidan Jinoyat kodeksining 188-1-moddasi (pul mablag‘larini va (yoki) boshqa mol-mulkni jalb etishga doir noqonuniy faoliyat) va 243-moddasi (jinoiy faoliyatdan olingan daromadlarni legallashtirish) bilan jinoyat ishlari qo‘zg‘atilib, tergov harakatlari o‘tkazilmoqda.
“Avto 60 oy” ishi
“Avto 60 oy” MCHJning mansabdor shaxslari va boshqalarga nisbatan 2019-yil 12-oktabr kuni Jinoyat kodeksining 188-1-moddasi 1-qismi (pul mablag‘larini va (yoki) boshqa mol-mulkni jalb etishga doir noqonuniy faoliyat) bilan jinoyat ishi qo‘zg‘atilgan edi.
Tergov jarayonida J. Bahodirov o‘zining jinoiy sheriklari bilan oldindan til biriktirib, bir guruh bo‘lib, “Avto 60 oy” va Catalea Media MCHJ va YTT “J.Baxodirov”ni tashkil etib, 3 oy muddat ichida O‘zbekistonda UzAuto Motors AJ tomonidan ishlab chiqarilgan avtomashinalarni yetkazib berishni va’da qilib, avtomashina rusumiga qarab, 1 million so‘mdan 10 million so‘mgacha bo‘lgan miqdorda pul olib, mablag‘larni qo‘lga kiritgani aniqlangan.
Jinoyat ishi bo‘yicha “Avto 60 oy” MCHJ bosh ofisidan olingan buxgalteriya hujjatlaridagi ma’lumotlar bo‘yicha 19 344 dan ortiq shaxslar bilan shartnomalar tuzgani aniqlangan va ushbu shartnomalar jinoyat ishiga qo‘shilgan. Tergov harakatlari davomida jami yetkazilgan moddiy zarar 47,7 milliard so‘m ekani aniqlanib, shundan 36,8 milliard so‘m undirilgan. Sud hukmi bilan firma mas’ullari 4 yildan 8 yilgacha ozodlikdan mahrum etilgandi.
Izoh (0)