Andijon viloyati Xo‘jaobod tumanida fuqarolarning umra ziyorati uchun deb to‘lagan 1 milliard 650 million so‘m pullarini onlayn qimor o‘yiniga tikib yuborgan mas’ulga sud hukmi o‘qildi. Bu haqda “Markaziy studiya” informatsion dasturida ma’lum qilindi.
Qayd etilishicha, Din ishlari bo‘yicha qo‘mitaning Xo‘jaobod tumani mutaxassisi 2019-yildan boshlab umra ziyoratlari xarajatlari uchun amalga oshirilgan to‘lov pullarini Musulmonlar idorasi hisobraqamiga kirim qilmagan. U fuqarolarga to‘lov cheki safarga chiqayotganlarida berilishini aytgan.
“Qonuniy tartibda ishlash uchun fuqaro avvalambor ro‘yxatga olingandan keyin to‘lovni faqat bankda amalga oshirishi kerak”, — deydi Din ishlari bo‘yicha qo‘mitaning Andijon viloyati bo‘yicha mutaxassisi Jasurbek Mo‘minov. Uning so‘zlariga ko‘ra, Xo‘jaobod tumanidagi holatda fuqarolar pullarni mas’ulning qo‘liga bergan.
Ma’lumotlarga ko‘ra, holat bo‘yicha tergov yakunlangach, ish sudga oshirilgan. Biroq sud zalida ayblanuvchining pullarni berish va’dasiga ishonib, o‘z arizasini qaytarib olgan jabrlanuvchilar yana chuv tushgan. Ularga yetkazilgan moddiy zarar sud qarorida inobatga olinmagan.
Firibgarlikni sodir etgan shaxs ikki yil mansabdorlik va javobgarlik yuklatilgan vazifalarda ishlash vakolatidan mahrum bo‘lgan hamda 5 yilga qamalgan.
Mart boshlarida Andijon viloyati Qo‘rg‘ontepa tumanida onlayn qimorga pul tikish va yechib olish xizmatlari reklama qilinayotgani aniqlangandi. “O‘zmilliybank” AJning Surxondaryo viloyati Qumqo‘rg‘on tuman filiali xodimi esa sakkiz oy davomida xorijdan kelayotgan mablag‘larni 9 talik kod orqali o‘zlashtirib, shu muddat davomida bankning 170 ming dollarini qo‘lga kiritgani va qimorda yutqazib qo‘ygani xabar berilgandi. Shuningdek, Nukusda 9,2 mlrd so‘m pulni qimorda yutqazgan bank xodimi 8 yilga qamalgan edi.
Izoh (0)