Pekindagi Dasin xalqaro aeroportiga “Doksuri” supertayfuni yopirildi. Uchish-qo‘nish yo‘lagi va samolyotlar to‘xtash joyini suv bosdi, deb yozmoqda Sky News.
Havo bandargohidagi suv toshqini favqulodda va misli ko‘rilmagan hodisa bo‘ldi. Bu ko‘plab reyslarning bekor qilinishi va kechikishiga olib keldi — minglab odamlar Xitoy poytaxtidan na ucha oladi, na unga qo‘na oladi.
Pekinda tayfun oqibatida kamida 20 kishi halok bo‘ldi. Xitoy rahbari Si Szinpin mahalliy hokimiyatga tafyun tuzog‘iga tushib qolgan odamlarni qutqarish, qurbonlar va moddiy zararni kamaytirish uchun barcha choralarni ko‘rishni buyurdi.
Temiryo‘l stansiyalari yopildi, 52 mingdan ortiq odam evakuatsiya qilindi.
Bo‘ron Xitoy ichkarisiga kirgan sari kuchsizlanayotgan bo‘lsa-da, rasmiylar yana suv toshqini xavfi borligidan ogohlantirmoqda. So‘nggi bir necha kun ichida yog‘ingarchilik miqdori 2012-yilning iyul oyidagi yog‘inlar rekordini yangiladi.
- Xitoyning yaqin tarixidagi eng halokatli suv toshqini 1998-yilda sodir bo‘lgan, o‘shanda 4 150 kishi halok bo‘lgan.
- 2021-yilda markaziy Xenan provinsiyasida 300 dan ortiq odam suv toshqini oqibatida halok bo‘ldi, o‘sh yili provinsiya poytaxti Chjenchjouda keng ko‘lamli yog‘ingarchilik kuzatildi.
Izoh (0)