Nigerda harbiylar prezident Muhammad Bazumni ag‘darganidan keyin Yevropa Ittifoqi ushbu mamlakatdan o‘z fuqarolarini evakuatsiya qilishga qaror qildi. Bu haqda Yevropa diplomatiyasi rahbari Jozep Borrel aytib o‘tdi.
“Hozircha biz Niger budjetini qo‘llab-quvvatlashni, shuningdek, xavfsizlik bo‘yicha hamkorlikdagi barcha tadbirlarni to‘xtatishga qaror qildik. Yevropa fuqarolarini vataniga qaytarishga ham qaror qildik va bu operatsiyani amalga oshiryapmiz”, — deb yozadi u.
Bundan tashqari, Yevropa Ittifoqi G‘arbiy Afrika mamlakatlari iqtisodiy hamjamiyatining (ECOWAS) Nigerda “konstitutsiyaviy tuzumni tiklash” haqidagi qarorlariga qo‘shiladi, deb ta’kidladi Borrel.
Iyul oyi oxirida tashkilot Nigerdagi harbiy to‘ntarish ishtirokchilaridan bir hafta ichida mamlakatda konstitutsiyaviy tuzumni tiklashni va Bazumni ozod qilishni talab qilgandi. ECOWAS, agar talablar bajarilmasa, vaziyatga kuch bilan aralashishni istisno qilmagan.
ECOWAS — G‘arbiy Afrikadagi 15 ta davlatning mintaqaviy ittifoqi. Unga Benin, Gambiya, Gana, Gvineya-Bisau, Kot-d’Ivuar, Kabo-Verde, Liberiya, Niger, Nigeriya, Senegal, Syerra-Leone, Togo, Burkina-Faso, Gvineya va Mali kiradi (oxirgi uchta mamlakatning ittifoqqa a’zoligi harbiy to‘ntarishlardan keyin to‘xtatib qo‘yilgan).
Nigerda 26-iyul kuni davlat to‘ntarishi bo‘lib o‘tdi, isyonchilar prezident Muhammad Bazum hokimiyatdan chetlatilgani va hibsga olinganini e’lon qildi. Ular chegaralarni yopdi va komendantlik soati joriy qildi. Prezident gvardiyasi boshlig‘i Abdurahmon Chiani o‘zini yangi rahbar deb e’lon qildi.
BMT, AQSH, Yevropa Ittifoqi va Afrika Ittifoqi isyonchilarning harakatlarini qoraladi. Vashington Niger bilan xavfsizlik sohasida hamkorlikni to‘xtatish, YI esa moliyaviy yordamni to‘xtatish bilan tahdid qildi. Shu bilan birga, Burkina-Faso va Mali qo‘shma bayonot chiqarib, Niger ichki ishlariga aralashuvni urush e’lon qilish deb hisoblashini aytdi.
Izoh (0)