Shavkat Mirziyoyev raisligida o‘tkazilayotgan yig‘ilishda ajratilayotgan subsidiyalar egalariga yetib bormayotgani bo‘yicha ham aholida eʼtirozlar ko‘pligi taʼkidlandi, deb xabar bermoqda Prezident matbuot xizmati.
Mahalla raislari va hokim yordamchilari bandlik, yoshlar va ayollar jamg‘armalari orqali berilayotgan subsidiyalar, oilaviy kreditlar hisobidan mehnat qurollari va tadbirkorlik uchun zarur mahsulotlarni xarid qilish tizimidan norozi. Mablag‘lar aholiga to‘g‘ridan to‘g‘ri berilmasdan, mahallabay va Yoshlar agentliklari hamda Markaziy bankning market pleyslari orqali “tenderlarda g‘olib bo‘lgan taʼminotchilar”ga o‘tkazib beriladi.
Yaʼni, aholida tanlov yo‘q, agentlik yoki bankning elektron platformalaridagi sotuvchilar nimani qancha narxda taklif qilsa, aholi shuni olishga majbur. Aholida tanlash imkoniyati yetmaganiday, taklif qilinayotgan mahsulot va xizmatlar bozordan 20-25 foiz qimmat.
Bosh prokuratura, Hisob palatasiga imtiyozli mablag‘lar hisobidan aholiga mahsulot va xizmatlar taqdim qilayotgan market pleyslar faoliyati shaffofligini tekshirish topshirildi.
Izoh (0)