Toshkent shahrining Sergeli tumanidagi “Nilufar” mahallasida yashovchi aholi vakillari elektr taʼminotidagi uzilishlar haqida shikoyat qilib, masʼullardan yordam so‘radi.
Mana soat kechki 10:05 bo‘ldiki, Sergeli-2 da hali ham “svet” yo‘q. Hamma yoq zim-ziyo, qop-qorong‘i. Ikki-uch soatdan beri “svet” yo‘q. Kelyapti, o‘chyapti, yana kelyapti, o‘chyapti. Texnikalar kuyyapti. Bunga kimdir javob beradimi? Nega Sergeli tuman “res”ini boshlig‘i, mundoq eplab ishini qilolmayapti. Hamma yoq zim-ziyo mana. Ko‘chada faqat mashina chirog‘i yonsa, ko‘cha ko‘rinyapti. Bo‘lmasa, ko‘cha ham ko‘rinmaydi. Yo‘lning narigi tomonidagi uylarda “svet” bor. Bu yoqda, Sergeli-2, “Nilufar” mahallasida “svet” yo‘q. Mahallaning nomi tag‘inam Nilufarmish, zimiston mahalla deyish kerak, — deydi Muzaffar Ahmedov ismli murojaatchi “Daryo”ga bu haqda shikoyat qilar ekan.
Murojaatchi masʼullarga murojaat qilib, muammoni bartaraf etishlarini, tuman Elektr taʼminoti korxonasi rahbariyatiga chora ko‘rishlarini so‘raydi.
Qachon bu muammolar tugaydi? Har doim o‘chadi. Ishdan kelgan paytingizda uyda “svet” yo‘q. Hamma yoq qop-qorong‘i. Bu muammoni bartaraf etib, Sergeli tuman “res”iga chora ko‘radigan bormi? Yoki bo‘ldimi, hammasi tugadimi? Shunaqa yashashga majburmizmi? Pul to‘lashga kelganda birinchi o‘rinda bular, — deydi u.
Murojaatchi elektr taʼminotidagi bunday uzilishlar fuqarolarga maʼnaviy zarar berayotganini aytib, “Buning uchun nega Sergeli ‘res’i jarima to‘lamaydi?”, — deydi.
Biz “svet”dan qarzdor bo‘lsak, shu zahoti o‘chirishadi. Nega pul to‘lab qo‘yib, elektrsiz o‘tirishimiz kerak? Nega narigi mahallada “svet” bor, lekin bizda yo‘q, — deydi murojaatchi.
“Daryo” murojaatchilar shikoyati bo‘yicha Energetika vazirligi axborot xizmatiga murojaat qildi.
O‘chishlar sababini izohlab, aholiga murojaat qilgandik. Bu rejali o‘chish emas-da. Majburiy o‘chish. Oldindan qayer o‘chishini hech kim bilmaydi. Qayerda sim qizisa yoki transformator kuyishga yaqinlasha boshlasa, shartta o‘chiriladi. O‘chirilmasa, Olmazor tumanida, yaqinda Mirobod, Yashnobodda bo‘lganidek, aholi 2-3 kunlab “svet”siz qolib ketishi mumkin, — deydi vazirlik axborot xizmati rahbari Hasan Toshxo‘jayev.
Avvalroq Energetika vazirligi O‘zbekiston bo‘ylab kuzatilayotgan elektr uzilishlariga izoh berib, sohada murakkab vaziyat yuzaga kelganini maʼlum qildi.
Taʼkidlanishicha, iyun oyida jami 34,8 million kVt/soat majburiy cheklov kiritilgan bo‘lsa, mazkur ko‘rsatkich iyul oyining o‘tgan 31 kuni mobaynida 175 million kVt/soatni tashkil qilgan. Yoz fasliga o‘tilganidan beri jami 210 million kVt/soat majburiy cheklov qo‘llanilgan.
Iyun oyida tizimda modernizatsiya va rekonsturksiya ishlarini xavfsiz olib borish maqsadida qator hududlarda maqsadli o‘chirishlar amalga oshirilgan. Bu haqda “Hududiy elektr tarmoqlari” AJ va uning hududiy filiallari hamda Energetika vazirligining barcha ijtimoiy tarmoqlardagi sahifa va kanallari orqali kamida bir sutka oldin xabarlar eʼlon qilib borilgan. Natijada birgina Toshkent shahrining o‘zida 542 ta transformator podstansiyasi va 592,36 kilometr elektr uzatish tarmoqlari mukammal, 923 ta transformator hamda 702,3 kilometr havo tarmog‘i joriy taʼmirlangan.
Past kuchlanishli elektr tarmoqlarini yangilash dasturiga muvofiq 930,6 kilometr past kuchlanishli elektr uzatish tarmoqlari hamda 228 ta transformator punktlari yangilangan/ “Sag‘bon”, “Yunusobod”, “Qo‘qon”, “Karvon”, “Qorasuv”, “Yalang‘och”, “Tuzel” va “Sergeli-35” podstansiyalaridagi 9 ta kichik quvvatli transformator katta quvvatlisiga almashtirilgan, — deyiladi masʼullar izohida.
Energetika vazirligiga ko‘ra, hozirgi sharoitda “Nima qilsa ham uzluksizlikni taʼminlayman”, deya zarur ehtiyot choralarini ko‘rmaslik, muqarrar avariya holati yuz berishi mumkinligini anglagan holda, barqarorlikka erishish istagida ortiqcha kuchlanishga o‘tila boshlagan hududlarni tarmoqdan uzmaslik ham yechim emas, aksincha, katta muammoga olib keladi.
Bunday vaziyatda energiya tejamkorlikka qatʼiy rioya qilish, xonadonlarda ham barcha xonani emas, atigi bittasini sovitish, ishlatilmayotgan elektr uskunalarini tarmoqdan sug‘urish, zarurat bo‘lmagan hollarda, ayniqsa, kunduz kunlari lampochkalarni o‘chirib qo‘yish eng maqbul yo‘ldir.
Xalqimizdan bugungi anomal issiq sharoitida Energetika vazirligi hamda uning tizim tashkilotlari tarafidan amalga oshirilayotgan majburiy choralarni to‘g‘ri tushunishlarini hamda qo‘llab-quvvatlashlarini so‘raymiz, — deya taʼkidlanadi xabarda.
Izoh (0)