Тошкент шаҳрининг Сергели туманидаги “Нилуфар” маҳалласида яшовчи аҳоли вакиллари электр таъминотидаги узилишлар ҳақида шикоят қилиб, масъуллардан ёрдам сўради.
Мана соат кечки 10:05 бўлдики, Сергели-2 да ҳали ҳам “свет” йўқ. Ҳамма ёқ зим-зиё, қоп-қоронғи. Икки-уч соатдан бери “свет” йўқ. Келяпти, ўчяпти, яна келяпти, ўчяпти. Техникалар куйяпти. Бунга кимдир жавоб берадими? Нега Сергели туман “рес”ини бошлиғи, мундоқ эплаб ишини қилолмаяпти. Ҳамма ёқ зим-зиё мана. Кўчада фақат машина чироғи ёнса, кўча кўриняпти. Бўлмаса, кўча ҳам кўринмайди. Йўлнинг нариги томонидаги уйларда “свет” бор. Бу ёқда, Сергели-2, “Нилуфар” маҳалласида “свет” йўқ. Маҳалланинг номи тағинам Нилуфармиш, зимистон маҳалла дейиш керак, — дейди Музаффар Аҳмедов исмли мурожаатчи “Дарё”га бу ҳақда шикоят қилар экан.
Мурожаатчи масъулларга мурожаат қилиб, муаммони бартараф этишларини, туман Электр таъминоти корхонаси раҳбариятига чора кўришларини сўрайди.
Қачон бу муаммолар тугайди? Ҳар доим ўчади. Ишдан келган пайтингизда уйда “свет” йўқ. Ҳамма ёқ қоп-қоронғи. Бу муаммони бартараф этиб, Сергели туман “рес”ига чора кўрадиган борми? Ёки бўлдими, ҳаммаси тугадими? Шунақа яшашга мажбурмизми? Пул тўлашга келганда биринчи ўринда булар, — дейди у.
Мурожаатчи электр таъминотидаги бундай узилишлар фуқароларга маънавий зарар бераётганини айтиб, “Бунинг учун нега Сергели ‘рес’и жарима тўламайди?”, — дейди.
Биз “свет”дан қарздор бўлсак, шу заҳоти ўчиришади. Нега пул тўлаб қўйиб, электрсиз ўтиришимиз керак? Нега нариги маҳаллада “свет” бор, лекин бизда йўқ, — дейди мурожаатчи.
“Дарё” мурожаатчилар шикояти бўйича Энергетика вазирлиги ахборот хизматига мурожаат қилди.
Ўчишлар сабабини изоҳлаб, аҳолига мурожаат қилгандик. Бу режали ўчиш эмас-да. Мажбурий ўчиш. Олдиндан қаер ўчишини ҳеч ким билмайди. Қаерда сим қизиса ёки трансформатор куйишга яқинлаша бошласа, шартта ўчирилади. Ўчирилмаса, Олмазор туманида, яқинда Миробод, Яшнободда бўлганидек, аҳоли 2-3 кунлаб “свет”сиз қолиб кетиши мумкин, — дейди вазирлик ахборот хизмати раҳбари Ҳасан Тошхўжаев.
Аввалроқ Энергетика вазирлиги Ўзбекистон бўйлаб кузатилаётган электр узилишларига изоҳ бериб, соҳада мураккаб вазият юзага келганини маълум қилди.
Таъкидланишича, июнь ойида жами 34,8 миллион кВт/соат мажбурий чеклов киритилган бўлса, мазкур кўрсаткич июль ойининг ўтган 31 куни мобайнида 175 миллион кВт/соатни ташкил қилган. Ёз фаслига ўтилганидан бери жами 210 миллион кВт/соат мажбурий чеклов қўлланилган.
Июнь ойида тизимда модернизация ва реконстурксия ишларини хавфсиз олиб бориш мақсадида қатор ҳудудларда мақсадли ўчиришлар амалга оширилган. Бу ҳақда “Ҳудудий электр тармоқлари” АЖ ва унинг ҳудудий филиаллари ҳамда Энергетика вазирлигининг барча ижтимоий тармоқлардаги саҳифа ва каналлари орқали камида бир сутка олдин хабарлар эълон қилиб борилган. Натижада биргина Тошкент шаҳрининг ўзида 542 та трансформатор подстанцияси ва 592,36 километр электр узатиш тармоқлари мукаммал, 923 та трансформатор ҳамда 702,3 километр ҳаво тармоғи жорий таъмирланган.
Паст кучланишли электр тармоқларини янгилаш дастурига мувофиқ 930,6 километр паст кучланишли электр узатиш тармоқлари ҳамда 228 та трансформатор пунктлари янгиланган/ “Сағбон”, “Юнусобод”, “Қўқон”, “Карвон”, “Қорасув”, “Яланғоч”, “Тузел” ва “Сергели-35” подстанцияларидаги 9 та кичик қувватли трансформатор катта қувватлисига алмаштирилган, — дейилади масъуллар изоҳида.
Энергетика вазирлигига кўра, ҳозирги шароитда “Нима қилса ҳам узлуксизликни таъминлайман”, дея зарур эҳтиёт чораларини кўрмаслик, муқаррар авария ҳолати юз бериши мумкинлигини англаган ҳолда, барқарорликка эришиш истагида ортиқча кучланишга ўтила бошлаган ҳудудларни тармоқдан узмаслик ҳам ечим эмас, аксинча, катта муаммога олиб келади.
Бундай вазиятда энергия тежамкорликка қатъий риоя қилиш, хонадонларда ҳам барча хонани эмас, атиги биттасини совитиш, ишлатилмаётган электр ускуналарини тармоқдан суғуриш, зарурат бўлмаган ҳолларда, айниқса, кундуз кунлари лампочкаларни ўчириб қўйиш энг мақбул йўлдир.
Халқимиздан бугунги аномал иссиқ шароитида Энергетика вазирлиги ҳамда унинг тизим ташкилотлари тарафидан амалга оширилаётган мажбурий чораларни тўғри тушунишларини ҳамда қўллаб-қувватлашларини сўраймиз, — дея таъкидланади хабарда.
Изоҳ (0)