Sentabr oyida Ukraina prezidenti Vladimir Zelenskiy Birlashgan Millatlar Tashkiloti Bosh Assambleyasi sessiyasida qatnashish uchun Nyu-Yorkka borishi mumkin, deb xabar bermoqda Bloomberg o‘z manbalariga tayanib.
Agentlik suhbatdoshlarining fikricha, Zelenskiy Nyu-Yorkda o‘zining “Tinchlik formulasi”ni, urushni to‘xtatishga qaratilgan 10 banddan iborat rejasini taqdim etadi.
Shu bilan birga, Bloomberg manbalari Rossiya prezidenti Vladimir Putinning BMT Bosh Assambleyasida ishtirok etishini kutmayapti. Ular Rossiya prezidentining safarlari Xalqaro jinoiy sud orderi tufayli cheklanganini eslatdi.
Buni Rossiya prezidentining matbuot kotibi Dmitriy Peskov qisman tasdiqladi. Jurnalistlarning ushbu safar ehtimoli haqidagi savoliga javob berar ekan, Peskov “hozircha prezidentning bunday rejalari yo‘q”, dedi.
Eslatib o‘tamiz, 17-mart kuni Gaagadagi Xalqaro jinoiy sud Rossiya prezidenti Vladimir Putinni hibsga olishga order bergandi. U Ukrainaning bosib olingan hududlaridan bolalarni Rossiyaga noqonuniy deportatsiya qilishda gumon qilinmoqda.
Iyul oyida Vladimir Putin BRIKS sammiti uchun Janubiy Afrika Respublikasiga bormasligi, tadbirda onlayn ishtirok etishi maʼlum bo‘ldi. JAR rasmiylarining o‘zi Rossiyadan shuni so‘ragan, chunki JAR Gaagadagi sud qaroriga bo‘ysunadi va Putinni hibsga olishga majbur bo‘ladi.
Izoh (0)