Jizzax va Andijonda iyul oyi uchun bola puli to‘lab berilmayapti. Masʼullar boshqa hududlarda ham shu muammo borligini tan oldi

“Daryo”ga Jizzax va Andijon viloyatida yashovchi fuqarolar murojaat qilib, 2023-yilning iyul oyi uchun bolalar nafaqasi haligacha to‘lanmaganini aytib, kechikish sababini bilolmayotganini maʼlum qildi.

Andijon viloyatining Asaka tumanida yashovchi Jaloliddin Ahmedov 3 yoshgacha bo‘lgan bola puli olishini, ammo 2023-yilning iyul oyida bu mablag‘ to‘lab berilmaganini aytib, sababini bilolmayotganini qo‘shimcha qildi.

Bundan to‘rt-besh oy ilgari odatda oyning 15-16 sanalarida pulimiz tushgan bo‘lardi. Keyinchalik bu muddat uzayib, pullar 23-24-sanalarda plastik kartochkamizga tushirib beriladigan bo‘ldi. Iyul oyiniki esa mana bugun 1-avgust bo‘lsa-da, haligacha to‘lab berilmadi, — deydi murojaatchi fuqaro Jaloliddin Ahmedov.

Jizzax viloyatining Zarbdor tumanida yashovchi murojaatchilardan biriga ko‘ra, u 3 nafar farzandi uchun har oy 580 ming so‘m miqdorida nafaqa oladi.

Iyul oyining nafaqasi haligacha to‘lab berilmadi. Oylik xarajatlarimizni shunga qarab rejalashtirganimiz bois pul tushishini intiq bo‘lib kutyapmiz, — deydi ismi to‘liq ko‘rsatilishini istamagan N.B.

Iqtisodiyot va moliya vazirligi axborot xizmati rahbari Sarvinoz Ahmedovaga ko‘ra, bu muammo nafaqat Jizzax va Andijonda, respublikaning ko‘plab hududlarida bor.

Bu muammo joylardagi hokimliklar bilan bog‘liq muammo bo‘lib, tez orada yechimini topadi, — deydi muammoni o‘rganib, batafsil maʼlumot berishini aytgan Sarvinoz Ahmedova.

Iqtisodiyot va moliya vazirligi axborot xizmati rahbari Sarvinoz Ahmedovaning aniqlashtirishicha, ayni kunga qadar respublikada bola puli oluvchilarning 70 foiziga pul to‘lab berilgan.

Ertaga 90 foiz bo‘ladi, — deydi bunga qo‘shimcha qilgan masʼul.

“Daryo” muxbiri ayni kunda respublika bo‘yicha necha nafar fuqaroga bolalar nafaqasi to‘lab berilishiga aniqlik kiritish maqsadida masʼuldan qo‘shimcha axborot so‘radi. Sarvinoz Ahmedova bu bo‘yicha qo‘shimcha maʼlumot berilishini maʼlum qildi.

“Daryo” voqealar rivojini kuzatishda davom etadi.