Жиззах ва Андижонда июль ойи учун бола пули тўлаб берилмаяпти. Масъуллар бошқа ҳудудларда ҳам шу муаммо борлигини тан олди

“Дарё”га Жиззах ва Андижон вилоятида яшовчи фуқаролар мурожаат қилиб, 2023 йилнинг июль ойи учун болалар нафақаси ҳалигача тўланмаганини айтиб, кечикиш сабабини билолмаётганини маълум қилди.

Андижон вилоятининг Асака туманида яшовчи Жалолиддин Аҳмедов 3 ёшгача бўлган бола пули олишини, аммо 2023 йилнинг июль ойида бу маблағ тўлаб берилмаганини айтиб, сабабини билолмаётганини қўшимча қилди.

Бундан тўрт-беш ой илгари одатда ойнинг 15-16 саналарида пулимиз тушган бўларди. Кейинчалик бу муддат узайиб, пуллар 23-24-саналарда пластик карточкамизга тушириб бериладиган бўлди. Июль ойиники эса мана бугун 1 август бўлса-да, ҳалигача тўлаб берилмади, — дейди мурожаатчи фуқаро Жалолиддин Аҳмедов.

Жиззах вилоятининг Зарбдор туманида яшовчи мурожаатчилардан бирига кўра, у 3 нафар фарзанди учун ҳар ой 580 минг сўм миқдорида нафақа олади.

Июль ойининг нафақаси ҳалигача тўлаб берилмади. Ойлик харажатларимизни шунга қараб режалаштирганимиз боис пул тушишини интиқ бўлиб кутяпмиз, — дейди исми тўлиқ кўрсатилишини истамаган Н.Б.

Иқтисодиёт ва молия вазирлиги ахборот хизмати раҳбари Сарвиноз Аҳмедовага кўра, бу муаммо нафақат Жиззах ва Андижонда, республиканинг кўплаб ҳудудларида бор.

Бу муаммо жойлардаги ҳокимликлар билан боғлиқ муаммо бўлиб, тез орада ечимини топади, — дейди муаммони ўрганиб, батафсил маълумот беришини айтган Сарвиноз Аҳмедова.

Иқтисодиёт ва молия вазирлиги ахборот хизмати раҳбари Сарвиноз Аҳмедованинг аниқлаштиришича, айни кунга қадар республикада бола пули олувчиларнинг 70 фоизига пул тўлаб берилган.

Эртага 90 фоиз бўлади, — дейди бунга қўшимча қилган масъул.

“Дарё” мухбири айни кунда республика бўйича неча нафар фуқарога болалар нафақаси тўлаб берилишига аниқлик киритиш мақсадида масъулдан қўшимча ахборот сўради. Сарвиноз Аҳмедова бу бўйича қўшимча маълумот берилишини маълум қилди.

“Дарё” воқеалар ривожини кузатишда давом этади.