Surxondaryo viloyatining sobiq hokimi To‘ra Bobolov Toshkent viloyatining Oqqo‘rg‘on tumaniga hokim vazifasini vaqtincha bajaruvchi etib tayinlandi. Bobolov tayinlovga qadar Savdo-sanoat palatasi raisi o‘rinbosari lavozimida faoliyat yuritgan.
To‘ra Bobolov 2023-yilning fevral oyida boshqa ishga o‘tishi munosabati bilan Surxondaryo viloyati hokimi lavozimidan ozod etilgandi. U 2019-yilning may oyidan Surxondaryo viloyati hokimi vazifasini bajaruvchi etib tayinlangan. 2020-yil yanvar oyida rasman viloyat hokimi lavozimiga tasdiqlangandi.
To‘ra Bobolov Surxondaryo viloyati hokimi sifatida faoliyat yuritgan paytda prokurorni haqorat qilgani aytilgan audiolar tarqalgandi. Shundan so‘ng Bobolov prezident qarori bilan o‘z faoliyatini davlat siyosati va amalga oshirilayotgan islohotlarga mos ravishda tashkil etmagani, hokimlarga qo‘yiladigan talablarga rioya etmasdan, majlis qatnashchilarini haqorat qilgani va bu bilan keng jamoatchilikning noroziligiga sabab bo‘lgani uchun jazolangani ochiqlangandi.
Sardor Umurzoqov ushbu jazoni eʼlon qilar ekan, hokimga quyidagicha murojaat qildi:
To‘ra Bobolov, siz o‘rnak bo‘lmayapsiz. Internetda chiqqan gaplarni montaj dedingiz. Lekin ekspertiza sizning ovozingizni tasdiqladi. Prezidentimiz topshirig‘i bilan sizga intizomiy jazo chorasi sifatida oylik ish haqining 40 foizi miqdorida jarima qo‘llandi. Tegishli mutassaddilar Surxondaryo viloyatini kompleks o‘rgansin, muammolarga yechimi bilan taklif tayyorlasin, kerak bo‘lsa, aniqlangan qonunbuzilishlar yuzasidan jinoiy ish ochishgacha bo‘lgan choralar ko‘rilsin.
Shundan so‘ng ko‘p o‘tmay To‘ra Bobolov viloyat hokimi lavozimidan olinib, o‘rniga Toshkent shahar prokurori Ulug‘bek Qosimov tayinlangandi.
Izoh (0)