Бухоро шаҳар Ибн Сино кўчасида жойлашган икки қаватли савдо дўконларида ёнғин содир бўлди. Бу ҳақда вилоят ФВБ матбуот хизмати хабар берди.
1 август куни соат 02:05 да вилоят ФВБ навбатчи диспетчерлик хизматига вилоят Миллий гвардия ходими қўнғироқ қилиб, йўл ёқасида жойлашган икки қаватли савдо дўконлари (халқ тилида эски ПМК савдо мажмуаси)да ёнғин содир бўлаётгани тўғрисида хабар берган.
Воқеа жойига вилоят гарнизонидан 11 та ёнғин-қутқарув экипажи ҳамда 7 та ҳамкорликдаги хизматлар техникалари жалб этилди. Ёнғин жойига соат 02:07 да етиб бориб, савдо дўконларининг тахминан 700 квадрат метр майдонга тарқалиб ёнаётгани тўғрисида маълумот олинган ва соат 03:11 да батамом ўчирилган.
Ёнғин оқибатида Ибн Сино кўчаси йўли ёқасида жойлашган тадбиркорлик субъектларига тегишли икки қаватли 15 та дўконнинг ички товар маҳсулотлари ва шифт қисми ёнган бўлиб, худди шу манзилда бўлган Бухоро марказий деҳқон бозорига қарашли бир қаватли савдо павильонидаги 8 та савдо дўкони (жами 23 та дўкон) ичида бўлган товар моддий бойликлари ва дўкон жиҳозлари ёниб зарар кўрган. Ёнғиндан бозор тасарруфидаги павильон ва савдо дўконларининг 10 минг квадрат метр майдони сақлаб қолинган.
Ёнғин натижасида инсонларнинг ҳалок бўлиш ва тан жароҳати олиш ҳолатлари қайд этилмаган.
Содир бўлган ёнғин юзасидан вилоят ИИБ ва ФВБ томонидан терговга қадар текширув ишлари олиб борилмоқда. Ёнғиннинг келиб чиқиш сабабини аниқлаш мақсадида ёнғин-техник экспертизаси тайинланган.
Воқеа жойига вилоят сектор раҳбарлари, ФВБ бошқармаси бошлиғи ва бошқа масъул раҳбарлар жалб этилган.
Изоҳ (0)