Eng kam daromad o‘qituvchi va shifokorlarda. Ular boshqa sohadagilarga nisbatan kambag‘allashishda davom etmoqda

O‘zbekistonda o‘rtacha oylik ish haqi — 4,3 million so‘m. O‘qituvchi va shifokorlarning o‘rtacha oyligi esa 3 million so‘mdan oshmagan.

Taʼlim va sog‘liqni saqlash xodimlarining o‘rtacha oylik ish haqi sohalar kesimida hisoblaganda eng quyi pog‘onada qolmoqda. Bu ko‘rsatkich Statistika agentligi taqdim etgan navbatdagi maʼlumotlarda aks etgan.

Hisob–kitoblarga ko‘ra, 2023-yilning yanvar—iyun oylarida taʼlim sohasi vakillarining o‘rtacha ish haqi 3 million so‘mni tashkil etib, 2022-yilning mos davriga nisbatan 17,5 foizga o‘sgan. Tibbiyot sohasi xodimlarining ish haqi o‘tgan yilning mos davriga qaraganda 20,6 foizga o‘sib, 2,8 million so‘mga yetgan.

Hisobot davrida o‘qituvchi va shifokorlarning nominal hamda real daromadlari o‘sgani ko‘rinadi. Ammo bu o‘sish jamiyatning boshqa sohalaridagi oylik ish haqilariga qaraganda sekin kechmoqda. Shu sababli taʼlim va sog‘liqni saqlash vakillari boshqa soha xodimlariga nisbatan kambag‘allashishda davom etmoqda. Jumladan, taʼlim sohasi vakillarining ish haqi 2021-yilning yanvar—iyun oylari holatiga respublikadagi o‘rtacha oylik ish haqining 76 foizini tashkil etgan bo‘lsa, bu ko‘rsatkich joriy yilning mos davriga kelib 70,2 foizgacha pasaygan. Tibbiyot sohasi xodimlarida 2021-yilda 69,3 foiz bo‘lgan bu ko‘rsatkich, 2023-yilga kelib 66,1 foizgacha pastlagan.

Taqqoslash uchun, moliya va bank sohasi vakillarining ish haqi 2021-yilda respublikadagi o‘rtacha oylikdan 2,47 barobar, 2023-yilga kelib esa 2,87 barobar yuqori bo‘lmoqda. Mazkur soha xodimlarining o‘tgan yarim yillikdagi o‘rtacha oylik ish haqi 12,4 million so‘mni tashkil etgan va 2022-yilning mos davriga nisbatan 34 foizga o‘sgan. Axborot va aloqa sohasi vakillarida bu ko‘rsatkich 2021-yilda 1,73 barobarni tashkil etgan bo‘lsa, 2023-yilga kelib 2,2 barobarga yetgan. Yanvar—iyun oylarida bu sohadagi o‘rtacha oylik ish haqi 9,5 million so‘mni tashkil etib, 2022-yilning mos davriga qaraganda 38,3 foizga o‘sgan.

Joriy yilning dastlabki 6 oyida taʼlim sohasining asosiy tarmoqlari bo‘yicha o‘rtacha oylik ish haqining eng yuqori ko‘rsatkichi oliy taʼlimda (7,1 million so‘m), eng past ko‘rsatkich esa maktabgacha taʼlimda (1,6 million so‘m) kuzatildi. Bu davrda umumiy o‘rta taʼlim xodimlari 3 million so‘m, texnik va professional taʼlim vakillari 3,1 million so‘mdan oylik olgan.

Taʼlim sohasi bo‘yicha o‘rtacha oylik ish haqining eng yuqori ko‘rsatkichi Toshkent shahri (4,9 million so‘m), Namangan (3 million so‘m) hamda Toshkent viloyatlarida (3 million so‘m) kuzatilgan.

Sog‘liqni saqlash va ijtimoiy xizmatlar ko‘rsatish sohasining faoliyat turi bo‘yicha o‘rtacha oylik ish haqining eng yuqori ko‘rsatkichi Toshkent shahri (3,5 million so‘m), Xorazm viloyati (3,2 million so‘m) hamda Qoraqalpog‘iston Respublikasida (3,1 million so‘m) qayd etilgan.