Энг кам даромад ўқитувчи ва шифокорларда. Улар бошқа соҳадагиларга нисбатан камбағаллашишда давом этмоқда

Ўзбекистонда ўртача ойлик иш ҳақи — 4,3 миллион сўм. Ўқитувчи ва шифокорларнинг ўртача ойлиги эса 3 миллион сўмдан ошмаган.

Таълим ва соғлиқни сақлаш ходимларининг ўртача ойлик иш ҳақи соҳалар кесимида ҳисоблаганда энг қуйи поғонада қолмоқда. Бу кўрсаткич Статистика агентлиги тақдим этган навбатдаги маълумотларда акс этган.

Ҳисоб–китобларга кўра, 2023 йилнинг январь—июнь ойларида таълим соҳаси вакилларининг ўртача иш ҳақи 3 миллион сўмни ташкил этиб, 2022 йилнинг мос даврига нисбатан 17,5 фоизга ўсган. Тиббиёт соҳаси ходимларининг иш ҳақи ўтган йилнинг мос даврига қараганда 20,6 фоизга ўсиб, 2,8 миллион сўмга етган.

Ҳисобот даврида ўқитувчи ва шифокорларнинг номинал ҳамда реал даромадлари ўсгани кўринади. Аммо бу ўсиш жамиятнинг бошқа соҳаларидаги ойлик иш ҳақиларига қараганда секин кечмоқда. Шу сабабли таълим ва соғлиқни сақлаш вакиллари бошқа соҳа ходимларига нисбатан камбағаллашишда давом этмоқда. Жумладан, таълим соҳаси вакилларининг иш ҳақи 2021 йилнинг январь—июнь ойлари ҳолатига республикадаги ўртача ойлик иш ҳақининг 76 фоизини ташкил этган бўлса, бу кўрсаткич жорий йилнинг мос даврига келиб 70,2 фоизгача пасайган. Тиббиёт соҳаси ходимларида 2021 йилда 69,3 фоиз бўлган бу кўрсаткич, 2023 йилга келиб 66,1 фоизгача пастлаган.

Таққослаш учун, молия ва банк соҳаси вакилларининг иш ҳақи 2021 йилда республикадаги ўртача ойликдан 2,47 баробар, 2023 йилга келиб эса 2,87 баробар юқори бўлмоқда. Мазкур соҳа ходимларининг ўтган ярим йилликдаги ўртача ойлик иш ҳақи 12,4 миллион сўмни ташкил этган ва 2022 йилнинг мос даврига нисбатан 34 фоизга ўсган. Ахборот ва алоқа соҳаси вакилларида бу кўрсаткич 2021 йилда 1,73 баробарни ташкил этган бўлса, 2023 йилга келиб 2,2 баробарга етган. Январь—июнь ойларида бу соҳадаги ўртача ойлик иш ҳақи 9,5 миллион сўмни ташкил этиб, 2022 йилнинг мос даврига қараганда 38,3 фоизга ўсган.

Жорий йилнинг дастлабки 6 ойида таълим соҳасининг асосий тармоқлари бўйича ўртача ойлик иш ҳақининг энг юқори кўрсаткичи олий таълимда (7,1 миллион сўм), энг паст кўрсаткич эса мактабгача таълимда (1,6 миллион сўм) кузатилди. Бу даврда умумий ўрта таълим ходимлари 3 миллион сўм, техник ва профессионал таълим вакиллари 3,1 миллион сўмдан ойлик олган.

Таълим соҳаси бўйича ўртача ойлик иш ҳақининг энг юқори кўрсаткичи Тошкент шаҳри (4,9 миллион сўм), Наманган (3 миллион сўм) ҳамда Тошкент вилоятларида (3 миллион сўм) кузатилган.

Соғлиқни сақлаш ва ижтимоий хизматлар кўрсатиш соҳасининг фаолият тури бўйича ўртача ойлик иш ҳақининг энг юқори кўрсаткичи Тошкент шаҳри (3,5 миллион сўм), Хоразм вилояти (3,2 миллион сўм) ҳамда Қорақалпоғистон Республикасида (3,1 миллион сўм) қайд этилган.