“Профилактик тадбир ўтказилган”. ИИБ ходимлари боғча болаларига маъруза қилганига муносабат билдирилди

Ижтимоий тармоқларда ички ишлар ходимининг мактабгача таълим муассасасида бир гуруҳ тарбияланувчи болаларга насиҳат қилаётгани акс этган видео тарқалгани тўғрисида хабар берилганди. Тошкент шаҳар мактабгача ва мактаб таълими бошқармаси ҳолатга муносабат билдирди.

Маълум қилинишича, 17 июль куни Учтепа туманидаги давлат мактабгача таълим ташкилоти раҳбари томонидан туман ИИО ФМБ, мудофаа ишлари бўлими ҳамда “Фарҳод” маҳалла фуқаролар йиғини раиси номига ҳамкорликда “Ҳарбийлар билан учрашув” мавзусида профилактик тадбир ўтказиш юзасидан таклифнома юборилган.

Профилактика инспекторлари боғча тарбияланувчиларига Ватанга муҳаббат, ота-она қадри ва келажакда ватанни қўриқлайдиган мард ўғлон ва қизлар бўлиб етишишлари, боғчадан нотаниш фуқаролар билан кетмаслиги, уйини бегона шахсларга очмаслик ҳақида суҳбат ўтказиб, ўзлари билан олиб келган китоб ва ўйинчоқларни боғча тарбияланувчиларига совға қилишган.

Тадбир тафсилотлари акс этган видео гуруҳ тарбиячиси тарбияланувчилар ота-оналарини жамлаган Telegram гуруҳига ташлаб берган. “Афсуски, айрим ота-оналар томонидан бу видео лавҳа бошқа гуруҳларга ташланиб, томошабинлар томонидан нотўғри талқин қилинганлиги ачинарлидир”, — дейилади хабарда.

“Ҳурматли давлат мактабгача таълим ташкилотлари директорлари! Тошкент шаҳар мактабгача ва мактаб таълим бошқармаси сизлардан бу каби тадбирларни аниқ белгиланган дастур ва режа асосида болажонлар учун қизиқарли ўтишини таъминлашларини сўрайди. Бундан ташқари, таълим муассасаси ҳудудига бегоналар кирмаслигини таъминлашингиз лозимлигини яна бир бор эслатиб ўтамиз.

Шунингдек, ижтимоий тармоқ муаллифлари воқеликка чуқурроқ ёндашсалар айни муддао бўларди. Чунки, фарзандларимиз хавфсизлиги, уларнинг саломатлиги барчамиз учун бирдек муҳим деб биламиз”, — дейилади муносабатда.

2022 йил сентябрда Тошкент шаҳар Мирзо Улуғбек туманида жойлашган 142-сонли мактабда ички ишлар органлари ходимлари, мактаб маъмурияти ҳамда ўқувчилар ўртасида ўтказилаётган профилактик суҳбат жараёни акс этган видео ва фотосурат тарқалиб, кенг муҳокамаларга сабаб бўлганди.