Iqtisodchi bloger Otabek Bakirov o‘zining Telegram’dagi kanalida Statistika agentligi tomonidan Minimal isteʼmol xarajatlari eʼlon qilingani ortidan keltirilgan raqamlarni so‘roq ostiga olib, “O‘zbekiston kambag‘allari yanada kambag‘allashdimi?”, “Bu nima degani?”, “Hurmatli, Statagentlik”, “Statagentlikka taklif: xo‘p, men aybdor bo‘lay, lekin siz avval kambag‘allarning 6 oylik haqini qaytaring” nomli turkum materiallar eʼlon qildi.
Bunga javoban Statistika agentligi esa “Ortiqcha shov-shuvga berilish – ilmsizlikdan dalolat” nomli maqola bilan munosabat bildirdi. Javob materiali shunday boshlanadi: “Hurmatli Otabek Bakirov, doimiy tarzda Statistika agentligi tomonidan eʼlon qilib borilayotgan mamlakatimizning rasmiy ijtimoiy-iqtisodiy statistik ko‘rsatkichlariga asossiz, yuzaki tanqidlar, masalaning ichiga to‘liq kirmasdan, tushunib tahlil qilmasdan yondashib, munosabat berib kelasiz. Agar tanqid asosli va eng muhimi to‘g‘ri bo‘lsa, marhamat, bunga ortiqcha eʼtiroz yo‘q”.
“Daryo” internet nashri keng jamoatchilik qiziqish bildirayotgan iqtisodchi va Statistika agentligi o‘rtasidagi munosabatga yuzma-yuz o‘tirib oydinlik kiritish maqsadida maydon yaratib, ikkisini ham suhbatga chaqirdi. Va bunga ikki tomon ham roziligini bildirdi.
Statistika agentligi rahbarining “Daryo” so‘roviga labbay deb javob bergani, albatta, quvonarli hol bo‘ldi. Boisi hukumat amaldorlari orasida yurak yutib, har qanday savolga javob berishga tayyorlari kam. Boshqa jihatdan, Statistika agentligi direktorining chiqishi OAVga yopiq bo‘lgan boshqa rahbarlarga namuna bo‘lishi turgan gap edi.
Afsuski, bunday bo‘lib chiqmadi...
“Ruxsat so‘rashim kerak”
“Daryo” nashri kelishuvga ko‘ra, mehmonlarga 20-iyul kuni soat 16:00 ga suhbatni tasvirga olish uchun studiya tayyorlab qo‘ydi. Aytilgan vaqtdan chamasi 30 daqiqa o‘tib, Statistika agentligi direktori Bahodir Begalov o‘nlab xodimlari bilan studiyaga kirib kelib, boshlovchidan rahbarni so‘raydi va nashr bosh muharriri bilan gaplashadi.
Bahodir Begalov agentlik rahbari ekani va shu bois biror OAVda chiqish qilishdan avval yuqoridan ruxsat kerakligini aytadi. Shu o‘rinda “tepaning ruxsatisiz chiqish qilolmaydigan amaldor suhbatga nega rozi bo‘ldi-yu, nega studiyaga keldi?” degan tabiiy savol tug‘iladi. Katta idorada rahbar bo‘lib ishlovchi shaxsning g‘alati xatti-harakatlari bu bilan tugamadi...
“Chiroqlarni o‘chiring”
Suhbatni rad etgan Bahodir Begalov studiyadagi maxsus chiroqlarni o‘chirib qo‘yishni so‘raydi. Unga chiroqlar nega xalal berayotgani so‘ralganda esa u “men bu yerga intervyu berishga emas, Otabek Bakirov bilan ochiq muloqot qilishga keldim”, deb javob qaytardi. Vaholanki, janob Begalov qayerga va nima maqsadda taklif etilganini juda yaxshi bilar, “Daryo” savollariga javob berish uchun butun jamoasi bilan kelgan edi. Shunday bo‘lsa-da, u chiroqlari o‘chirilgan qorong‘i studiyada iqtisodchi bloger bilan aynan nima haqda “ochiq muloqot” qilib olmoqchi bo‘lgani jumboqligicha qoldi.
“Boshlovchi kerak emas”
Nima xohlayotganini tushuntirmayotgan Bahodir Begalov suhbat uchun tayyorlab qo‘yilgan stulga o‘tirish chog‘ida suhbatni olib boruvchi jurnalistga qarata: “Siz chiqib keting, bizga boshlovchi kerak emas”, deya shart qo‘ydi. Unga bu yer uning ishxonasi emasligi va jurnalistga topshiriq yoki buyruq berishga vakolati yo‘q ekani tushuntirilgach, studiyani tark etdi.
“Daryo” nashri masalani o‘zaro konstruktiv muloqot o‘rnatish yo‘li bilan hal qilish maqsadida jamoatchilik uchun ochiq bo‘lgan maydon yaratish vazifasini o‘z oldiga maqsad qilgan.
Nashr qaysidir blogerni davlat amaldoriga “ushlab berib”, qorong‘i xonalarda yopiq eshiklar ortida o‘rtadagi nizoni “razbor” qiladigan joy emas. Tabiiyki, buni o‘zini va o‘zgalarni hurmat qiladigan, madaniyatli shaxs tushunadi. Xususan, Bahodir Begalov ham o‘zi uchun xulosa qiladi, degan umiddamiz.
Izoh (0)