“Янги Ўзбекистон Конституцияси” ягона миллий портали ўз фаолиятини бошлади

Адлия вазирлигининг хабар қилишича, ўзбек ва хорижий тилларда “Янги Ўзбекистон Конституцияси” ягона миллий портали ўз фаолиятини бошлади.

Мазкур портал орқали қонунчиликни янги таҳрирдаги конституцияга мувофиқлаштириш ҳамда уни амалга оширишда юзага келаётган муаммоларни бартараф этиш бўйича таклифлар қабул қилинади.

Шунга кўра, фуқаролар конституциядаги ҳар бир модда бўйича таклифларини қолдириши мумкин.

"Жараёнда таклифларингиз билан фаол иштирок этинг ва қонунчилик мустаҳкамланишида ўз ҳиссангизни қўшинг", — дейилади вазирлик хабарида.

Аввалроқ Олий Мажлис Сенати аъзоси Шавкат Аюпов янгиланган Конституция юзасидан фикр билдира туриб, ҳозирги асосий мақсад янги Конституцияни яхшилаб ўрганиш эканлигини айтиб ўтганди.

"Ўйлайманки, ҳозирги асосий мақсадимиз янги Конституцияни яхшилаб ўрганиш. Айниқса, ёшлар учун керак. Чунки асосий қомусдан тўғри фойдаланиш учун ҳар биримиз уни батафсил ўрганиб чиқишимиз керак. Янги олган маълумотларга асосланиб, қайтадан иш бошлаймиз”, — деди Шавкат Аюпов.