O‘zbekistonda ilk bor davlat-xususiy sherikchilik asosida GESlar quriladi. Bu haqda “O‘zbekgidroenergo” AJ axborot xizmati xabar berdi.
Qayd etilishicha, “O‘zbekgidroenergo” AJ O‘zbekistonda birinchi bor davlat-xususiy sheriklik (DXSH) asosida umumiy quvvati 46,6 MVt, yillik o‘rtacha ishlab chiqarishi 179 million kVt/soat va umumiy qiymati 106,9 million dollar bo‘lgan 5 ta — “Qizildaryo”, “Suvlisoy”, “Dukentsoy”, “Qamchiq” va “Quyi Ko‘ksuv” GES loyihalari yagona lot sifatida investor (xususiy sherik) jalb qilish maqsadida malaka so‘rovi tenderiga qo‘yadi.
DXSH asosida qurilishi rejalashtirilgan GESlarga Jahon banki tomonidan “Institutsional salohiyatni oshirish” grant mablag‘lari hisobidan yuqori malakaga ega xorijiy maslahatchilar yo‘llangan.
Xususan, Synergy Infrastructure and Financial Advisory Services Inc moliyaviy maslahatchi, Dolsar Engineering texnik maslahatchi va UNICASE yuridik maslahatchi sifatida tender asosida tanlab olingan hamda ushbu kompaniyalar bilan shartnomalar imzolangan.
Mazkur kompaniyalar loyiha hujjatlarini xalqaro standartlarga muvofiqlashtirish bo‘yicha ish olib boradi. Tenderlar yagona lot orqali o‘tkazilishi loyihalarning amalga oshirilishini soddalashtirib, jarayonni optimallashtiradi va samaradorlik hamda shaffoflikni taʼminlashda qo‘l keladi.
“Loyihalarning uzoq muddatli moliyaviy barqarorligi va hayotiyligini taʼminlashda, tabiiy resurslardan to‘liq foydalangan holda eng yuqori muhandislik standartlari asosida ishlab chiqilishida, qurilish jarayonining barcha jihatini huquqiy tartibga solishda xorijiy kompaniyalar tajribasidan foydalanilishi esa investorlar faoliyatini kafolatlashga xizmat qiladi”, — deyiladi xabarda.
“O‘zbekgidroenergo” AJ buyurtmachi sifatida mazkur loyihalarning ishga tushirilishida barcha manfaatdor mahalliy hamda xorijiy investorlarni tender savdolarida faol ishtirok etishga taklif qiladi. Tender savdolari 2023-yil avgust oyida lotga chiqarilishi rejalashtirilgan.
O‘zbekistonda may oyi davomida respublikada 5,8 milliard kVt/soat elektr energiyasi ishlab chiqarilgan. Bu o‘tgan yilning mos davriga nisbatan 285,4 million kVt/soat yoki 5,2 foiz ko‘p. Shuningdek, respublika iste’molchilariga 5,3 milliard kVt/soat elektr energiyasi yetkazib berildi. Mazkur ko‘rsatkich 2022-yilning shu davriga nisbatan 514,6 million kVt/soat yoki 11 foiz ko‘p.
Surxondaryoda Yuqori To‘palang GES ishga tushsa, 1 560 ta ish o‘rni yaratilib, 850 mingdan ortiq xonadon elektr energiya bilan taʼminlanishi haqida aytilgan edi. Shuningdek, Andijon viloyatining ikki tumanida 16-iyun kuni yangi mikro GESlar ishga tushirilgan edi.
Izoh (0)