Ўзбекистонда илк бор давлат-хусусий шерикчилик асосида ГЭСлар қурилади. Бу ҳақда “Ўзбекгидроэнерго” АЖ ахборот хизмати хабар берди.
Қайд этилишича, “Ўзбекгидроэнерго” АЖ Ўзбекистонда биринчи бор давлат-хусусий шериклик (ДХШ) асосида умумий қуввати 46,6 МВт, йиллик ўртача ишлаб чиқариши 179 миллион кВт/соат ва умумий қиймати 106,9 миллион доллар бўлган 5 та — “Қизилдарё”, “Сувлисой”, “Дукентсой”, “Қамчиқ” ва “Қуйи Кўксув” ГЭС лойиҳалари ягона лот сифатида инвестор (хусусий шерик) жалб қилиш мақсадида малака сўрови тендерига қўяди.
ДХШ асосида қурилиши режалаштирилган ГЭСларга Жаҳон банки томонидан “Институционал салоҳиятни ошириш” грант маблағлари ҳисобидан юқори малакага эга хорижий маслаҳатчилар йўлланган.
Хусусан, Synergy Infrastructure and Financial Advisory Services Inc молиявий маслаҳатчи, Dolsar Engineering техник маслаҳатчи ва UNICASE юридик маслаҳатчи сифатида тендер асосида танлаб олинган ҳамда ушбу компаниялар билан шартномалар имзоланган.
Мазкур компаниялар лойиҳа ҳужжатларини халқаро стандартларга мувофиқлаштириш бўйича иш олиб боради. Тендерлар ягона лот орқали ўтказилиши лойиҳаларнинг амалга оширилишини соддалаштириб, жараённи оптималлаштиради ва самарадорлик ҳамда шаффофликни таъминлашда қўл келади.
“Лойиҳаларнинг узоқ муддатли молиявий барқарорлиги ва ҳаётийлигини таъминлашда, табиий ресурслардан тўлиқ фойдаланган ҳолда энг юқори муҳандислик стандартлари асосида ишлаб чиқилишида, қурилиш жараёнининг барча жиҳатини ҳуқуқий тартибга солишда хорижий компаниялар тажрибасидан фойдаланилиши эса инвесторлар фаолиятини кафолатлашга хизмат қилади”, — дейилади хабарда.
“Ўзбекгидроэнерго” АЖ буюртмачи сифатида мазкур лойиҳаларнинг ишга туширилишида барча манфаатдор маҳаллий ҳамда хорижий инвесторларни тендер савдоларида фаол иштирок этишга таклиф қилади. Тендер савдолари 2023 йил август ойида лотга чиқарилиши режалаштирилган.
Ўзбекистонда май ойи давомида республикада 5,8 миллиард кВт/соат электр энергияси ишлаб чиқарилган. Бу ўтган йилнинг мос даврига нисбатан 285,4 миллион кВт/соат ёки 5,2 фоиз кўп. Шунингдек, республика истеъмолчиларига 5,3 миллиард кВт/соат электр энергияси етказиб берилди. Мазкур кўрсаткич 2022 йилнинг шу даврига нисбатан 514,6 миллион кВт/соат ёки 11 фоиз кўп.
Сурхондарёда Юқори Тўпаланг ГЭС ишга тушса, 1 560 та иш ўрни яратилиб, 850 мингдан ортиқ хонадон электр энергия билан таъминланиши ҳақида айтилган эди. Шунингдек, Андижон вилоятининг икки туманида 16 июнь куни янги микро ГЭСлар ишга туширилган эди.
Изоҳ (0)