Тармоқларда Сурхондарё вилояти ҳокими Улуғбек Қосимовнинг Денов туманида ўтказган йиғилиши ва унда фермерлардан бирини қамоққа олиш бўйича топшириқ бергани айтилган видеолар тарқалди. Вилоят ҳокимлиги ахборот хизмати бунга изоҳ берди.
Видеоматериалда 2023 йилнинг 4 июль куни Денов туманининг “Ҳазорбоғ” ҳудудида қишлоқ хўжалиги масалаларига бағишлаб соҳа мутасаддилари ва фермер хўжаликлари раҳбарлари иштирокида ўтказилган йиғилиш акс этган. Унда вилоят ҳокими тумандаги айрим фермер хўжаликлари пахта далаларида агротехник тадбирларни ўз вақтида ва сифатли ўтказиш билан боғлиқ муаммолар мавжудлиги, ажратилган ресурслардан мақсадсиз фойдаланиш ҳолатларига йўл қўйилаётганини танқид қилиб, мутасаддиларга мавжуд ҳолатларни ўрганиш ва ноқонуний хатти-ҳаракатларга ҳуқуқий баҳо бериш топшириғини берган, — дейилади ҳокимлик изоҳида.
Таъкидланишича, йиғилишдан сўнг эса хатти-ҳаракатларига ҳуқуқий баҳо берилиши кераклиги айтилган фермер хўжаликлари раҳбарларига камчиликларини тўғрилаш учун имкон берилган.
Мавжуд муаммолар қисқа муддатда бартараф этилган. Ҳеч қайси фермер хўжалиги раҳбари қамоққа олинмаган, — дейди ҳокимлик ахборот хизмати раҳбари Муродбек Давлатов.
Telegramъда тарқалган видеода Улуғбек Қосимов “Муттаҳам, юришинг фасон бўлиб, ҳамма нарсага тупуриб қўйгансан. Денов ёниб кетмайдими, э сенга ўхшаган, бунақа виждонсиз боқибеғамни ҳаётимда кўрмаганман. Кўр-кўрни қоронғида топади, бир-бирингга (ҳоким ўринбосари Алишер Алимардонов) моссан. Деновни ўлдириб, тамом қилдинг, ҳамма тумандан орқада. Шарманда қилиб, ер остига кўмиб юбординг. Ёз, Илҳом оғайни, бугун қамоққа оласан. Ишингнинг тайини йўқ, юрибсан тентираб, ҳамманг ўйинчилик қилиб, ўйинга ўтиб олгансанлар, ноинсофлар. Бир кун юриб, ёқамни ушладим, ҳамма нарса ‘саматок’”, — деганди.
Изоҳ (0)