Oliy sud 2019—2023-yillarda sudlangan shaxslar tomonidan sodir etilgan ayrim turdagi jinoyatlarning hududlar kesimi bo‘yicha dinamikasini e’lon qildi. “Daryo” hujjatni tahlil qilib, Jinoyat kodeksining 97—101-moddalari (qasddan odam o‘ldirish) bilan bog‘liq holatlar haqida ma’lumot beradi.
Raqamlar shuni ko‘rsatadiki, O‘zbekistonda qasddan odam o‘ldirish bilan bog‘liq jinoyatlar yildan yilga ko‘payib bormoqda. Xususan, bu holatni sodir etganlikda aybdor deb topilgan shaxslar 2019-yilda 376 nafarni tashkil etgan bo‘lsa, raqam 2020-yilda 377 nafarni, 2021-yilda 440 nafarni ko‘rsatgan. 2022-yilda esa ko‘rsatkich biroz pastlagan — 422 nafar. 2023-yilning dastlabki 3 oyi davomida 84 nafar shaxs ayni shu jinoyatni sodir etganlikda aybdor deb topilgan.
Hududlar kesimida tahlil qilinganda bu jinoyat eng ko‘p qayd etilgan hudud Toshkent viloyati ekani ma’lum bo‘ldi: ham umumiy hisobda, ham yillar kesimida. Viloyatda har yili kamida 67 nafar shaxs qasddan odam o‘ldirganlik uchun jazoga tortilmoqda. Ayniqsa, 2021-yilda bu ko‘rsatkich rekord darajaga ko‘tarilgan, 81 nafar shaxs sudlangan. Hududda 2019—2022-yillar davomida jami 303 nafar shaxs shu turdagi jinoyatni sodir etganlikda aybdor deb topilgan.
Ikkinchi o‘rinda Toshkent shahri qayd etilgan, hududda 4 yilda qasddan odam o‘ldirish bilan bog‘liq 208 ta holat aniqlangan. Uchinchi o‘rindagi Samarqandda esa bu ko‘rsatkich 176 ta.
Qasddan odam o‘ldirish jinoyatchiligi eng kam sodir etilgan hududlar reytingidan Sirdaryo (42), Buxoro (46) va Navoiy viloyatlari (46) hamda Qoraqalpog‘iston Respublikasi (46) o‘rin olgan.
Izoh (0)